Seziqalile ukuphuma izimemo zomshado omhlophe kaKhuzani

SEZIQALILE ukuphuma izimemo zomshado omhlophe zomculi kamaskandi waseMandaba, eNkandla, uKhuzani Mpungose, njengoba uzobanjwa izinsuku ezimbili.

Maphakathi nalo nyaka uKhuzani wamemezela ukuthi uzobe egcagcelwa ngoDisemba 15, kubo eMandaba

Waveza ukuthi ngalolu suku umema wonke umuntu, ngisho abalandeli bakhe ukuze bazombona ethatha unkosikazi.

Isimemezelo sakhe wayesifake ekhasini lakhe enkundleni yokuxhumana iFacebook.

Izolo Isolezwe libone isimemo sezinhlelo zomshado wakhe njengoba kuzoqala omhlophe, okumenywe kuwo abakhethiwe ozoba maphakathi nesifundazwe, endaweni yomntakabani okujwayele ukuthi kubanjwe kuyo imishado yabadla izambane likapondo ngoDisemba 11.

Kulesi simemo izicukuthwane ziyalelwe ukuthi zigqoke okumnyama, njengoba kuyiwona umbala wosuku.

Uma siqhubeka siveza ukuthi kuyothi ngoDisemba 15, abe esesinelwa unkosikazi wakhe ekhaya kubo.

Okugqamile kulesi simemo ukuthi uKhuzani akalifakanga igama lengoduso, njengoba namanje kungaziwa ukuthi intokazi ayithathayo ngeyakuphi.

Kodwa umthombo weSolezwe osondelene nalo mculo uveze ukuthi noma engalazi igama lalona wesifazane kodwa ungowakwaMathenjwa, KwaMhlabuyalingana.

“Impela uyashada, ngisho umndeni usemalungiselelweni okwamukela umakoti, njengoba kuyintombi yakhe yeminyaka. Uyena lona owabonakala ohlelweni lwakhe iKhuzani Bo! eyolotsholelwa amakhehla ayesuka eNkandla, eya ekhweni lakhe. Kujabule wonke umuntu emndenini ngesinqumo asithathile ngoba bese kuyiminyaka etshelwa ukuthi usekwenze konke okuhle ekhaya nasempilweni yakhe sekushoda umakoti,” kusho umthombo.

Kwenzeka lokhu nje, uKhuzani usanda kukhipha i-albhamu ethi Inhlanhla Iza Nebhadi.

Kule albhamu ephume yathakaselwa abaningi kukhona izingoma ezihlukene kuyo esezenze kahle zaze zafinyelela ekulalelweni abantu abangu-1 million ezinkundleni zomculo ezi-online.

KwiFacebook uKhuzani ulokhu ebabonge njalo abalandeli bakhe ngokuthanda umculo wakhe abakhiphela wona kanye ngonyaka.