IMOTO: GAC MOTOR EMKOO
INKAMPANI efike eNingizimu Afrika ngenyanga eyedlule iGAC Motor isiyilamanise eduze imoto i-Emzoom ezibule ngayo emakethe yakuleli ngokwethula entsha i-Emkoo.
Le nkampani, iGuangzhou Automobile Group Co. (GAC) ngeyaseChina kodwa izimoto zayo zilethwa kuleli yiSalvador Caetano yasePortugal.
Ifike kuleli ngokwethula iSUV encintisana neToyota Corolla Cross namanye i-GS3 Emzoom eqala ku-R469 900.
Njengamanje sebelandelise nge-Emkoo nayo eyiSUV kodwa enkulu. Izobanga abathengi neVW Tiguan, Kia Sportage, Baic Beijing X55, Hyundai Tucson nezinye.
Njenge-Emzoom, i-Emkoo inenjini engu-1.5 litre turbo kaphethroli. Inamandla angu-130kW ne-torque engu-270Nm kuthi u-gearbox ube yi-7 speed automatic. Bathi idla amalitha kaphethroli angu-6.4 ngo-100km. Emgwaqeni intofontofo nokwenza ungakuvilapheli ukuthatha ibanga elide ngayo yize ibuye ibe ne-turbo lag ezwakala uma ufuna ukudlula enye imoto ngokushesha. Inama-drive mode ahlukene okungu-Economy, Comfort noSport ashintsha indlela isiteringi esizwakala ngayo nokunye.
Ifika inothe ngezinsiza zomshayeli ezahlukene okubalwa kuzo ezisiza ukuthi ihlale emzileni, adaptive cruise control, iyakuxwayisa ukuthi kunemoto eceleni uma uvula isicabha, futhi iyazibhrekela ukugwema ingozi nokunye. Kubuye kube namakhamera aveza wonke umzimba ngaphandle kanjalo nama-airbag ayisithupha.
I-Emkoo iyabukeka ngaphandle futhi kunemibala eyisihlanu okhetha kuyo, Inezinqawe ezimbili ngemuva futhi zonke zine-panoramic sunroof.
Ifika ihlukene ngezinhlobo ezimbili okuyi-Executive ne-Executive Plus. I-Executive ifika inamarimu angu-18 inch, amalambu angamaLED ngemuva nangaphambili azikhanyelayo uma kumnyama, panoramic sunroof nokunye.
I-Executive Plus yona ngakolunye uhlangothi kuyo kwengezwe amarimu angu-19 inch nezibuko zasemaceleni efudumalayo, iyazipaka, ibhuthi evuleka ngogesi, Heads-Up Display izihlalo zesikhumba ezifudumalayo eziphinde zibande nokunye.
Njengoba ubude bayo bungu-4 680mm benza isikhala ngaphakathi sibe sikhulu kwazise i-wheelbase ingu-2 750mm. Lokhu kwenza abagibeli abayisihlanu bahlale kahle kanjalo nempahla enesikhala esingu-638 litres ebhuthini.
Ine-touchscreen infotainment system engu-10.1 inch oxhuma kuyo iselula nge-Apple CarPlay, indawo yokushaja ngaphandle kwentambo, digital instrument cluster nokunye.
Isikhulu sakwaGAC Motor kuleli uMnuz Leslie Ramsoomar sigcizelele ukuthi banesitokwe samaphathi ezinyanga eziyisithupha asevele ekhona. Uthe banongoti abagcwele izwe lonke abalungele ukusiza amakhasimende abo uma eba nenkinga.
Uthe bazimisele ukuba namagaraji asabalele ezweni angu-40 ngaphambi kuka-2026.
Intengo:
Emkoo Executive: R599 900
Emkoo Executive Plus: R659 900
Ifika ne-warranty yeminyaka emihlanu noma u-150 000km ne-service plan yeminyaka emihlanu noma u-100 000km.