INCWADI : Beyond the ranges
UMBHALI:Riaan Vorster
UMSHICILELI: Riaan Vorster
IPHELELWA wugqozi nomdlandla wokusebenza insizwa ekhanda izikebhe echwebeni eliseCape Town. Kuthi isadidekile bese icabanga ngamaphupho eyayinawo kudalo, nezinjongo zayo eyazihoxisa ngesikhathi ithola itoho emtateni.
Umbhali uRiaan Vorster, waseNingizimu Afrika, ukubeka esithombeni sempilo yangeminyaka yo-1924, lapho kwakuhamba phambili ukugibela imikhumbi nezikebhe ikakhulu ebelungwini. Ngubani oshiya umsebenzi ngenhloso yokuzungeza amazwe ekubeni engazi muntu lapho aya khona?
Ulaxaza umsebenzi uMathew Travis, athathe umthwalo agibela umkhumbi ngenhloso yokuthola umlando ngempilo yabantu baseManaus, idolobha eliseBrazil.
Ngokwezinhlelo zohambo lukaTravis kubukeka kungamthatha amasonto ayisikhombisa ukufinyelela eBrazil. Akanankinga ngohambo olude ngoba akanawo umndeni ozosala ubalisa ngokuhamba kwakhe.
Ekhasini 12, ubeka kanje: "Okubalulekile kakhulu kimina wukuthi ngithole ithuba lokuvakashela eBrazil. Nginqume ukuthi ngiye eManaus, okuzoba yindawo yokuqala engizofikela kuyona futhi inamahlathi azungeza umfula omkhulu i-Amazon, oseBrazil," kuchaza uTravis ehlelela uhambo lwakhe.
Umlobi ugxile enyathukweni kaTravis, oyisishimane ngakho akekho umuntu ozosala ebalisa uma ehamba amasolokohlo ngenhloso yokuthola ulwazi ngeBrazil. Ohambweni lwakhe uzithela phezulu komakadebona bamagoduka abafuna ukuthola amatshe i-emerald, okwaziwayo ukuthi ayivela kancane futhi ayabiza.
Ziyima emthumeni kuTravis uma exoxa noHans Kesler, elinye igoduka elifundele ezomlando nokuthola amagugu alahlekile. Yize bevumelana ngokuningi kepha inkinga wukuthi uJack Byrne, owazi umlando nezindlela zokuthubeleza emahlathini aseManuas, ufuna imali eshisiwe ukuze abasize.
UJack uyabatshela ukuthi kunamazimuzimu ngenhla komfula iRio Negro. Uthi awawabheki amadoda, asobozela kwasani ezama ukuthatha amatshe ayigugu, e-emerald. Kuyacaca ukuthi inyathuko inezihibe eziningi kepha intshisekelo yamagoduka ayishabalali yize bazi ukuthi kungenzeka bangabuyi noma banduke bafele khona emahlathini.
Kuphela ukwazi uma amagoduka etholana phezulu nesizwe samaZacares, amazimuzimu kanti vese asebulawa yiphango
Umlobi uthubeleza nawe ngokomqondo phakathi kwemifula okuyi-Amazon, neRio Negro, agudle emadolobheni aseduze okubalwa iTaboca, iMarova, nezinye izindawo zaseBrazil.
Uyaziwa umlando wesimo sezulu sase-Amazon, kuvamise ukuthi ibizwe nge-Amazon Rainforest futhi imvelo yakhona ihlukile futhi inakekelwa ngekwezinga eliphezulu.
Ziningi ezinye izincwadi ezidayisa esitolo i-Exclusive Books kwi-https://exclusivebooks.co.za