UMBHALI: MJ Robotham
ABASHICILELI: Head of Zeus Ltd
ISIQWAYI sombhali esaziwayo futhi esithanda ubukhazikhazi, sidalula konke ngempilo yaso. Kuthi uma inkampani yabashicileli iphelelwa wushatini ngenxa yokugqoza kwebhizinisi, ivele incenge umbhali odumile uRuby Devereaux, ukuthi alobe okuthile ngenhloso yokuthuthukisa ibhizinisi.
I-The scandalous life of Ruby Devereaux, ilotshwe nguM.J. Robotham. Inoveli iqhakambisa owesifazane oyintatheli futhi ungazenyezi ngezinqumo futhi ongabhedelwa. URuby usebhale izincwadi eziningi ezibe wumgogodla webhizinisi lenkampani yokushicilela kepha bayakhononda abalandeli bakhe uma esangalobi.
Yize uRuby eseneminyaka ewu-90 kepha uyintandokazi yabalandeli futhi inkampani yabashicileli iyazi ukuthi uma ebhala incwadi izothengwa ubuthaphuthaphu. Ingqikithi yenoveli ilandisa ngempilo yangasese kaRuby. Empeleni abashicileli bafuna azikhinide zonke futhi adalule namasoka akhe ake athandana nawo phambilini. Inoveli ilandisa ngokukhula kwakhe kukaRuby, eLondon, ngemva kweMpi yeSibili yoMhlaba. Udumo lwakhe lokuba ngumlobi selimenze wavakashela amazwe ahlukene wathola ulwazi oluningi olwenza akwazi ukuqhulula amanoni ezincwadi.
Ulandisa ngamasoka akhe awu-12, kanti imambane enguRuby yaqala ukuqoma ineminyaka ewu-17.
Uloba incwadi nje, akasafuni ukuzibhalela ufuna kube nomsizi ozolalalela bese eqobela phansi konke akushoyo. Yinoveli enamancoko exoxa ngempilo yomlobi othanda ukungcebeleka nobukhazikhazi.