NJENGOBA wonke amehlo ethe njo kwindumezulu yomjaho wamahhashi iHollywoodbets Durban July enamhlanje ngoMgqibelo eGreyville, inkampani kaDJ Tira, i-Afrotainment, seyikhiphe isixwayiso ngomlisa ophume umkhankaso wokuqola amantombazane ngayo.
Le nkampani ize yenza isitatimende ngenhloso yokuqwashisa abantu ukuba baqaphele iqola elizibiza ngoBandile.
Ngokusho kwesitatimende, leli qola elithi lingumhlali waseThekwini, liheha abantu besifazane abasebasha ngomsebenzi owumbombayi okuthiwa utholakala etendeni lase-Afrotainment eligxunyekwe eGreyville njengamanje.
Kuthiwa lomlisa uhamba ezishaya isifuba ngokuthi wazana noTira futhi nguye omthume ukuba amtholele amantombazane imisebenzi.
I-Afrotainment ithe ayazani nalo Bandile futhi abanaye umsebenzi onaleli gama kule nkampani.
"Sekufikile ezindlebeni zethu ukuthi kunomuntu ozibiza ngoBandile ohamba eqamba amanga ethi uphuma e-Afrotainment. Usebenzisa inamba ethi: 081 871 7051 futhi uxhumana nabantu athi uzobatholela umsebenzi etendeni lase-Afrotainment uma bemnikeza isitatimende sasebhange sezinyanga eziyisithupha. Ngakho siyanicela nazi ukuthi uBandile akahlanganise lutho ne-Afrotainment."
Isitatimende sibuye sadonsa ngendlebe abantu ukuba baze bangalokothi banikeze nanoma wubani izitatimende zasebhange noma imininingwane yabo nalo Bandile ngoba uyiqola.