IZINTOKAZI zakuleli zizogubha uSuku lwaBantu besiFazane ngedili lomculo kwiSongstrsses of Durban Live Show eBarnyard Theatre, eSuncoast Casino, ngo-Agasti 9.
Lo mcimbi, ozoqala ngo-2 ntambama, wenziwa yintokazi edabuka eClermont, uNonzwakazi Maphumulo ngokubambisana neSouth African Music Perfoming Rights Association (Sampra).
UNonzwakazi uzobe eshiyelana inkundla noZawadi Yamungu.
"Laba baculi bazobhulelwa amazolo ngumzwilili, uZinhle Madela futhi umcimbi uzobe uphethwe wu-Artchild Afrika."
UNonzwakazi uthe ingqikithi yalo mcimbi wukugubha usuku lwabesifazane. "Abaculi besifazane baseThekwini bazobe bejabulisa izitatanyiswa, begubha usuku lwabesifazane futhi bebheka ubumqoka balolu suku."
UNonzwakazi uthole uxhaso lweSampra Development Fund okuhloswe ngalo ukuthuthukisa amaciko akuleli futhi oseluke lwazuzwa ngamaciko amaningi anjengoMaleh; Boohle; Holley Rey nabanye.
Izethameli zalo mcimbi zizothola thuba lokuzibonela uNonzwakazi eqhulula izingoma ezikwi-albhamu yakhe yesibili.
UNonzwakazi uthe le-albhamu yakhe entsha esihloko sithi Umhlahlandlela, izophuma ezitolo ezisezinkundleni zokuxhumana ngo-Agasti 22.
Leli cwecwe liphrojuswe nguJoseph Dube ngosizo lohlelo olubizwa ngeMusic Creator Support Fund, olungaphansi kweSouth African Music Rights Organisation (Samro).
Umcimbi kaNonzwakazi ulandela ayewenze ngosizo lwe-2021 Concerts SA Support Fund nolwe-2021 Presidential Employment Stimulus Programme ngaphansi koMkhandlu wezobuCiko kuZwelonke noMnyango wezobuCiko namaSiko KwaZulu-Natal.
"Ukuba nemisebenzi okumele uyenze kuletha injabulo ngoba thina njengamaciko sisazama ukucathula emuva kokuvalwa kwezwe. Ukuthola usizo lwakwaSamro noSampra kusho lukhulu kimi ngoba baseseka ngokusinikeza izinsiza ngokudala amathuba emisebenzi.
“Bengenzeli thina kuphela kodwa namanye amaciko esisebenzisana nawo kulolu hlelo." Uthe ulujabulele kakhulu lolu xhaso futhi usekulangazelele ukuba abantu bezwe abekupheka kusavalwe izwe.
Kwenzeka lokhu nje uNonzwakazi uhambela phezulu kulezi zinsuku njengoba i-albhamu abambe iqhaza kuyo kaKhanyisile Mtwetwa esihloko sithi African Bird, iqokwe amahlandla amathathu kumaSouth African Music Awards (Sama).