KUZOBE kusindwe ngobethole kwindumezulu yomcimbi wesizwe saseNadi, eMgungundlovu ngoMsombuluko kusukela ngo-10 ekuseni.
Inkosi yakule ndawo, uVusizwe kaSondelani Zondi, ithe ezicukuthwaneni ezilindelekile kubalwa usopolitiki uDuduzane Zuma, nowayeyiMeya yaseMsunduzi, uMnuz Themba Njilo. Inkosi ithe inhlosongqangi yalo mkhosi, ozobe ubanjelwe koMkhulu lakule sizwe, ukugqugquzela ukuziphatha kahle entsheni ukuze iqhubeke nokuzithiba ocansini ukugwema ukukhulelwa okungahlelelwe nezifo ezithathelanayo.
UNondaba uthe lesi sizwe siziqhenya kakhulu ngezintombi ezisengamatshitshi ngoba yizo eziqhakambisa isizwe saseNadi, emazweni.
Uthe abagcini ngokukhuthaza izintombi kodwa nabafana badonswa ngendlebe ngezidakamizwa nanoma yimiphi imikhuba engenayo inqubekela phambili. Inkosi ithe lomcimbi, obizwa nge-ENadi Isigqi Samaciko, sewenzeka okwesithathu kule ndawo.
Inxuse ukuba amalungu alesizwe aphume ngobuningi bawo ngoba kuzobe kufinywa ngendololwane futhi kunedili lomculo. Kwabazobe benandisa kubalwe uNtencane, uDuncan, Niseni, Nolly M, Isibani Sabaphansi, Inyathi, Izimbali Zamanadi, Thusheleni noSicelo Mncube.
