Kukhonya izintokazi zaseKZN koweBasadi in Music Awards

KUKHONYA izintokazi zaKwaZulu-Natal kwabaqokwe kumaBasadi in Music Awards ngoLwesine. Izilemani zaseNanda, uNaledi Aphiwe noNontokozo Mkhize, yibo abazihola phambili njengoba beqokwe eminxeni emibilli. UNaledi, ocula i-Afro pop, uqokwe emkhakheni weMusic Video of the Year, atholene kuwo phezulu noKharishma, Zee Nxumalo, Liema Pantsi noPabi Cooper kwathi kowe-Afro Pop Artist, waqhathwa noLwah Ndlunkulu, Zethe, Nomakhosini noMotlanalo.

UNontokozo, ocula umculo wokholo, uqokwe koweGospel Artist, lapho adlana khona imilala noXolly Mncwango, Sneiziey, Sindi Ntombela noMapula Monyepao. Kwi-Artist of the Year, uNontokozo uqhathwe noMakhadzi, Zee Nxumalo, Kamo Mphela noXolly Mncwango.

Omunye waseKZN okhona umdansi waseThekwini, uSnenhlanhla Mbatha, oqokwe emnxeni weChoreographer futhi uzodudulana noBontle Modisele, Delta The Leo noTlhogi Molefe. U-Anele "Ney The Bae" Zondo waseNewcastle uqhuthana amazenze emnxeni weBest Styled Artist noKamo Mphela, Faith K noMoozlie.

ULaconco waseMgungundlovu uqokwe emnxeni wePodcast Presenter of the Year, lapho exhimfana khona noPharoahi, Si Jones noRelebogile Mabotja. KwiJazz Artist kukhona uSalphina Kadiaka, Rorisang Sechele, Gabi Motuba noTshenelo. UMada Glory, Lani M, Undefynd, Dimahr noSankie Fayauman baqhathwe kwiReggae Artist. KwiTraditional Artist of the Year kutholene phezulu uMmaAusi, Miss Hillary, Esther Mphahlele noPhumla Music. KwiNewcomer of the Year kuboshelwe u-Ayarhkay, Mega Snowflake, Noni Muji noLani M. Emkhakheni waMapiano Artist kufakwe uBassie, uBabalwa M, uZee Nxumalo noKamo Mphela.

Abangene kumunxa we-Entertainment Radio Presenter ngoKgomotso Meso weKaya FM, uLootlove weMetro FM, uMannahleng Letuka weLesedi FM, uLebo Macela weLesedi FM noRelebogile Mabotja we702. 

Ukuvotela la maciko kugcina ngoJulayi 19 kanti abadle umhlanganiso bazomenyezelwa emcimbini oseJoburg Theatre eGoli ngo-Agasti 1 nangomhla ka-2. Izithameli ezingawubonanga bukhoma ziyobuye ziwubuke kwiSABC2.