KULINDELEKE izinguquko ezinqala emdlalweni uBettina Wethu oqale ukukhonjiswa kuSABC1 ngonyaka odlule, nobuya kusona lesi siteshi ngo-Agasti 15.
Lo mdlalo osuselwe kowaphesheya kwezilwandle othi Ugly Betty, sekuvele ukuthi ngeke baze babonakale abanye abalingisi abahamba phambili akade bekuwona ngesizini yokuqala.
Kubona kubalwa umlingisi ohamba phambili uFarieda Metsileng obelingisa indawo kaBetty manje le ndawo esizolingiswa uKamogelo Molatlhoe.
Omunye umlingisi oshiyile kulo mdlalo uZweli Dube obelingisa indawo kaDingaan Jiyani manje le ndawo esizolingiswa uLunga Tshabalala.
Uphrojusa ophinde abe umsunguli walo mdlalo uTshepiso Chikapa Phiri, uthe bajabule ngabalingisi abasha kulo mdlalo njengoba bebheke abantu abazoba nobudlelwane obudonsa amehlo ababukeli uma sebebona ubuso obusha nokuyinto eyenzekile uma sebeqopha noKamo noLunga.
“Sisebenze kanzima ukubuyisa lo mdlalo esibonile ngesizini yokuqala ukuthi ungumdlalo othandwa abantu ikakhulukazi imindeni njengoba ulungele abadala nabancane. Sijabule ukuthi sizokhombisa isizini yesibili yalo mdlalo futhi siyathemba ukuthi ababukeli bazowuthokozela njengoba kwenzeka ngesizini yokuqala. Siphethe izigameko ezihlukene ezizoqhubeka nokwenzeka eNubia nezizobenza bawuthokozele njengoba usagcwele namahlaya,” kusho uTshepiso.
Uveze ukuthi kule sizini uBettina ubhekana nezingqinamba eziningi futhi ezinzima empilweni nokuyinto ezoyisa lo mdlalo phambili njengoba awuthola umsebenzi ayewudinga manje, sekumele abhekane nabantu abahlukene kulo mkhakha akuwo.
Uthe okunye abakulindele ngalo mdlalo ukudoba ababukeli abasha futhi uqhubeke nokwenza kahle.
Uthe abanye abalingisi abazobonakala kulo mdlalo nabasha kubalwa u-Itumeleng Bokaba (Zaza), Hungani Ndlovu (Duma), Nimrod Nkosi no-Abby Molz.