OBESEMDLALWENI oqedwayo, iThe Queen, uSiyasanga Akhenime Mfenyana, uthi igcagcele esokeni kuye njengoba esezodlala indawo eqavile emdlalweni omusha osihloko sithi Gqeberha: The Empire. U-Akhenime uthe akubanga lula kuye ukufinyelela kuleli zinga.
"Yonke into engidlule kuyo ingiholele kulesi sikhathi. Uma iphupho lingakafezeki akusho ukuthi lisuke seliphunzile," kubhala u-Akhenime ekhasini lakhe lika-Instagram.
Bazomkhumbula abaningi u-Akhenime elingisa indawo yomfelokazi womlingiswa obebizwa ngoLucky.
Lo mlingisi ongudadewabo kaZenande Mfenyana, obenguGoodness kwi-The Queen, akakholwa ukuthi uzobe ebonakala kulo mdlalo ngemiSombuluko kuya kuLwesihlanu ngo-9 ebusuku.
"Ngizoqala ukubonakala kusukela ngoJanuwari 16, 2023. Ngiyabonga kwiTshedza Pictures nakuMzansi Magic ngaleli thuba lokulingisa kwiGqeberha-The Empire."
U-Akhenime uzobe elingisa nabanye ozakwabo akade asebenza nabo kwiThe Queen, okunguZandile Msutwana obenguVuyiswa, nomculi uPhila Madlingozi obenguBuntu.
Abanye ababoshelwe kulo mdlalo ngoMbulelo Grootboom, Kay Bikitsha, Anelen Matoti noZikhona Sodlaka.
Kulindeleke ukuba lo mdlalo owuchungechunge ube nesasasa njengoba udidiyelwa yinkampani ekhiqiza imidlalo engaconsi phansi okubalwa kuyo iThe River, Legacy neThe Republic.
IGqeberha: The Empire izongena esikhundleni seThe Queen esiqedela ukukhombisa isizini yokugcina futhi okungeyesikhombisa.