UCANDY "Tsamandebele" Mokwena uthi kufane nokufezeka kwephupho lakhe leminyaka ukubamba iqhaza emdlalweni wethelevishini ozoqala ukukhonjiswa kuMzansi Magic kusukela ngoJulayi, osihloko sithi Queen Modjadji.
UCandy (53), wodumo kwiShaka Bundu Girls neKalawa Chikitas, uzolingisa indawo kaMuyahabo, ozobe engomunye wamakhosikazi amahlanu kaMambo Mugodo futhi abuye abe usingamama kaMaselekwani.
Uthe okumchaze kakhulu ngokulingisa kwiQueen Modjadji ukuthi kuzobe kukhulunywa kakhulu ulimi aluncela ebeleni iKhelobedu.
"Mina ngiqale ukucula ngalolu limi kusukela ngo-1993. Ngicabele indlela ezinye izihlabani zomculo zaseLimpopo ezinjengoMasterKG, King Monada, Prince Benza nabanye. Ngibuye ngavulela nabalingisi indlela ngokudlala kwiGiyani: Land of Blood."
UCandy akayona neze imfundamakhwela kulo mkhakha wokulingisa njengoba eqale kwiGiyani: Land of Blood, wadlulela kwiSkeem Saam nakwiShebeen Queen 1&2.
Uthe ubonga kakhulu uNkulunkulu ngalezi zibusiso, ikakhulukazi abalandeli bomculo wakhe akade babewa bevuka naye.
"Okunye okungijabulise kakhulu ukuthi kulo mdlalo kuzobe kuhlanganiswe zonke izilimi zaseLimpopo, okuyisiVenda, isiPedi nesiTsonga kodwa ulimi oluzobe lukhulunywa kakhulu isiKhelobedu.
“Ngakho sengijahe kabi ukuba kushaye uJulayi ukuze abantu bazibonele lo mdlalo. Bazothola ukwazi kabanzi ngesizwe sabaBalobedu namasiko aso kanjalo nemvunulo yaso."
Uthe unethemba lokuthi ulimulweKhelobedu lizogcina seliwulimu lwesi-12 kwezisemthethweni kuleli zwe.
Esephetha uCandy uthe uzosheba ukulingisa nomculo.
Kulo mdlalo uCandy uzolingisa noPriscilla Raboroko, umlingisi weScandal! uMakoma Mohale okunguye odlala indawo eqavile yeNdlovukazi yeMvula kanye nonobuhle abaqhamuka eLimpopo, uShudu Musida noNdavi Nokeri.
UNokeri ulingisa indawo kaMuthanoni Khensani, ongomunye wamakhosikazi kaQueen Modjadji wesizwe samaTsonga ekubeni uMusida onguMathanoni, ungomunye wabafazi abadabuka esizweni samaVenda.
