NJENGOBA kuyinyanga yabantu besifazane, umsakazi okwiTop 3 yomncintiswano woKhozi FM yakuleli sonto, uMinenhle “Minimizer” Masondo-Zulu, uphakamise ukuba kucijwe abantu besilisa ngamakhono okunakekela abantu besifazane.
UMinenhle uthe uyakholelwa ekutheni kungaphela ukuhlukunyezwa nokubulawa kwabantu besifazane nezingane uma abesilisa bengafukulwa ngolwazi kusetshenziswa imisakazo.
“Badinga ukufundiswa ngokuziphatha nokuhlonipha abesifazane njengoba bebonakala ukuthi basenkingeni abesifazane ngokubulawa abesilisa.”
Uthe uyabonga kakhulu ezikhulwini zoKhozi ngokumnikeza ithuba lesibili lokungenela iWinnie Mahlangu Next Female Presenter Search, lapho eqhathwe khona noSesethu, noBonny.
UMinenhle uthe ukuqokwa kusho elinye ithuba eliphinde lavuleka kuye.
"Lisho ukuthi noma kunzima noma iphupho lingafezekanga eminyakeni edlule kodwa akulahlwa mbeleko ngakufelwa. Angifuni ukubeka phansi umbhobho ngoba lokho kungasho ukushabalala kwephupho lami leminyaka."
UMinenhle unxuse umphakathi waseNingizimu Afrika ungamlahleli izandla futhi ungadinwa nguye.
"Ngihlushwa iphupho lokuba umsakazi ozojabulisa, afundise abantu umhlaba wonke, aphinde abuyisele okuhle emphakathini. Umuntu ngumuntu ngabantu."
UMinenhle uzichaze njengentokazi ewuthanda kakhulu umsakazo nehlezi ifuna ukwenza uguquko emphakathini waseNingizimu Africa.
"Ngiwumuntu wesifazane ozinikela kakhulu ekusizeni abasuke beswele izintandane nabantu abadala abangenabani empilweni nasekuthuthukiseni ikhono labantu abasha. Lokho bengikwenza ngokusebenzisa imisakazo yemiphakathi okuyiNongoma FM, iMvula FM neZululand FM ukunxenxa abantu ukuthi benikele ngezimpahla nezingubo ukusiza abaswele."
Uthe uma engathola ithuba lokuba soKhozini FM lokho kungamenza akwazi ukulekelela abantu abaningi baKwaZulu-Natal naseNingizimu Afrika.
"Ngiwumuntu wesifazane onetshisekelo ekushintsheni impilo yabantu. Ngiyazithoba kakhulu kunina nonke nisazovota. Ngiyawuthanda umsakazo ngiyakholelwa ekutheni unezimfundiso ekukhuthazeni intsha kanye nabesifazane ukuthi basukume bazimele, bengalali.“
UMinenhle ufunde oBumbano Primary, eNyonebomvu HP naseSbusiso High ngaphambi kokwenza iziqu ze-Office Adminstration, KwaGqikazi TVET College.
*Ukuvotela uMinenhle uthumela iSMS ebhalwe ukuthi WINNIE A, ukuvotela uBonny uthumela iSMS ebhalwe ukuthi WINNIE B kanti ukuvotela uSesethu uthumela iSMS ebhalwe ukuthi WINNIE C ku-33665.