Ifike kwezwakala imidlalo Ithonga neNimba iqokwa emcimbini wamaSAFTA
UZENANDE Mfenyane okuphenduleke imithandazo yabalandeli bomdlalo Inimba njengoba eqokwe emunxeniobabulekile emcimbini wamaSAFTA
Image: Sigciniwe
KUPHENDULEKE imithandazo yababukeli abaningi bomdlalo Inimba, njengoba izolo abahleli bomcimbi amaSouth African Film and Television Awards (SAFTA), bememezele abaqokwe emcimbini wanonyaka, nokukhona kubo umlingisi oyisithandwa kwabaningi uZenande Mfenyane.
Abalandeli bomdlalo Inimba, bebehlale bemncoma uZenande ngendlela alingisa ngayo indawo kaThumeka, ngakho akungatshazwa ukuthi bajabule ngokuqokwa kwakhe kulo mcimbi okuzobe kungoka-19 kulo nyaka.
Kuzobe sekucaca ngoMashi 13 no-14 ukuthi uyayithola yini le ndondo abalandeli bakhe akade bemfisela yona.
Kulo mcimbi ozobe usakazwa bukhona kuMzansi Magic nakwiSABC2, uqokwe emunxeni weBest Supporting Actress in a Telenovela nabalingisi okukhona kubo uBrumilda van Rensburg, olingisa emdlalweni iKelders Van Geheime noZodwa Nkosi olingisa indawo kaFaith emdlalweni iThonga.
Inkampani iTshedza Pictures, ekhiqiza imidlalo efana neThonga neYoungins iyona ehambe phambili ngokuqokwa njengoba ibonakala eminxeni engu-24 nesiqokwe kakhulu iminyaka emibili ilandelana.
Ibe isilandelwa yinkampani iQuizzical Pictures eqokwe izikhawu ezingu-22 ngemidlalo okukhona kuyo iReyka, White Lies neSavage Beauty.
Umdlalo omdala kuleli iGenerations: The Legacy uqokwe izikhawu ezingu-7 kanti ozakwabo esiteshini iSABC1, iSkeem Saam, iqokwe izikhawu ezinhlanu kwathi Uzalo lwaqokwa kane.
Abalingisi okukhona kubo uSello Maake ka-Ncube, Bonko Khoza, Zenande, Nelisiwe Sibiya, Celeste Loots, Sandra Prinsloo, Vusi Kunene noBrumilda van Rensburg yibona abaqokwe eminxeni emikhulu kulo nyaka.
Ngonyaka odlule lo mcimbi uthathe ikhefu njengoba abahleli bawo baveza ukuthi kuningi okumele kwenziwe uma ulungiselelwa.
U-Onke Dumeko, ongumphathi wenhlangano iNational Film & Video Foundation (NFVF), ehlela lo mcimbi, uthe kuyabajabulisa ukuthi bahloniphe la maciko eminxeni ehlukene nabathemba ukuthi usuku lomcimbi luyoba yinjabulo kwabaningi.