UMsakazi Ongadumile uqumbe phansi aboKhozi

UMPHATHI wezinhlelo zemicimbi onngaconsi phansi, uMsakazi Ongadumile Magwaza, ubonge umculi kamaskandi uKhuzani Mpungose emuva kokuqwaqwada ekhanda abasakazi boKhozi FM kwiTshatha Music Festival eLindizwe Stadium, KwaNongoma, izolo.

Ekhuluma kwiBhanyazile TV2, uMsakazi Ongadumile waseShowe, uthe ukwazana noKhuzani yikho okumwelise ngelibanzi kule nselelo abebhekene nayo. Isolezwe lithole ukuthi uSgwebo Sentambo owabaxhumanisa. Lithole nokuthi ubudlelwano balezi zinsizwa buqine ngale ndlela yokuthi izindleko zomngcwabo kanina woMsakazi Ongadumile zathwalwa wuKhuzani. Naye uMsakazi Ongadumile ubuye waphekisa uKhuzani ngamakesi kabhiya angu-10 kade egcagcelwa ngoDisemba 15.

Kulo mncintiswano, uMsakazi Ongadumile ukhale wemuka nesamba sika-R80 000 emkhakheni wabaphathi bezinhlelo ebebedlana imilala kwiTshatha Music Festival ebiseLindizwe Stadium KwaNongoma, ngoMsombuluko nayizolo. Lo mphathizinhlelo uhlabane ngamavoti awu-24 644. Isibili kube wumsakazi woKhozi FM uZama Mseleku ohlabane ngo-R50 000 ngamavoti awu-23 819, kwathi isithathu kwaba wuBhutiza Wodumo oklonyeliswe ngo-R30 000 ngamavoti awu-19 970.

Laba bahlule oMtshali Ongenamoto, Kiss Before, Londi Gazu, Ishinga LasoLundi, uMafresh,  Modelkazi noWelcome Ntombela.

Emkhakheni wabaculi kuphume phambili uMthembeni ngamavoti awu-16 250 maqede wazihlabanela ngesamba sika-R100 000. Ngokuthola amavoti awu-14 551 uMfo kaMsezane uzihlabanele ngo-R50 000, kwathi uJaiva Zimnike wakhala wemuka no-R25 000 ngamavoti awu-13 994.

Abanye abaculi ebebedlana imilala kulo mqhudelwano ngoMashampula, AmaNND International,  Mashwabana, Mayoghurt, Kasi Shandis, Sokolisa, Mashelela neJongelihle, Ntencane, Stabilithi, Mdumazi, Maganga,Khandalenja, Mbeje, Swidi  Mjolisi, Cmbero, Magoqa, Mlabalaba, Njabulo Langa, Mashelela noNqola. Ovote kakhulu uzihlabanele ngenkomo neselula.

Kulo mcimbi, uTshatha Ngobe ubonge kakhulu izithameli ebezifike ngobuningi bazo. Ubuye wazichazela kabanzi ngomlando waKwaNongoma ukuthi kwakuyisigodlo seNkosi uZwide futhi negama lenkundla obekubanjelwe kuyo le ndumezulu yomcimbi yaqanjwa ngesinye sezigodlo zikaZwide. Ubekusho lokho ehambisana nomlingisi uWiseman Mncube olingisa indawo kaZwide emdlalweni weTV iShaka Ilembe nenyosi ebihaya uZwide.

UNgizwe Mchunu umshayele elikhulu ihlombe uTshatha ngempumelelo yalo mcimbi. Kubaculi ebebeshiyelana inkundla kubalwa uJumbo, Big Zulu, Dladla Mshunqisi, Menzi, Khuzani, Mthandeni SK nabanye abaningi. Kubaphathi bohlelo bekukhona uSweet Guluva, Penny Ntuli, Bingelela, Mashudula, Nqubeko Ndlela nabanye.