Usesakaza ezemidlalo noMarawa ophunyuke kwiSIU

USAZIWAYO waseThekwini, uMinenhle "Minnie" Dlamini, uphunyuke olakeni lophiko oluphenya amacala abucayi, olwaziwa ngeSIU, maqede wazitholela itoho. Lesi silomo sesethula amazwibela emidlalo ye-Afcon kwiNetflix.

Le ntokazi esibuya kwiMetro FM nakwiSABC1 yethula lolu hlelo ngokubambisana noRobert Marawa kanye noMelissa. Ngokusho kwabeNetflix, lezi zilomo zizokuthatha zikubeke kokwenzeka kule midlalo kuze kushaye uJanuwari 19.

UMinnie unyelwa yinyoni esandleni nje, usanda kusinda ngokulambisa kwabeSIU emuva kokuhlomula kungafanele emalini yeNational Lotteries Commission. Isolezwe lithole ukuthi uMinnie ulanyulelwe ukuzivumela ukuthi uzowubuyisa u-R50 000 awuthola ngendlela engafanele enhlanganweni engenzi nzuzo, iMshandukani Foundation eminyakeni eyedlule.

Lokhu kuvele emuva kophenyo olunzulu lweSIU, okuyilo eliphenye uMinnie maqede izinqe zahlala obala. Le mali yayiyingxenye yenkece eyayibekelwe uchungechunge lokukhangisa ngomqhudelwano i-2016 Rio Olympic Games.

Abaphenyi bathola ukuthi imali yagcina seyifeza ezinye izinhloso. AbeSIU bakuqinisekisile ukuthi uMinnie wayengafanele ukuhlomula kulesi samba. Bathe uvumile ukuthi uzoyibuyisa njengoba injalo engakhonjwe ngasibhamu.

Ukubuyisa kukaMinnie le mali ngeminye yemizamo yalaba baphenyi yokuqoqa izimali zabakhokhi bentela ezikogalakajane bese zibuyiselwa kwababefanele bazihlomule.

Abanye osaziwayo abathintekayo ekubhebhudleni imali yeLotto yinkosi yekwaito eyazibeka u-Arthur Mafokate, umlingisi wodumo kwiTsotsi neThe Bold and The  Beautiful uTerry Pheto, umlingisi ongasekho futhi wodumo kwiTsotsi neThe River, uPresley "Cobrizzi" Chweneyagae, umethuli wezinhlelo wodumo kwiGenerations uCarol Bouwer, umsiki wengqephu uThula Sindi, umculi we-jazz uSelaelo Selota nomzwilili we-Afro soul, uSimphiwe Dana.

UMafokate usolwa ngokuzitika ngesamba sika-R56 million, uTerry usanda kudlelwa izithabathaba zemizi, iBMW nezindawo zokudlela ezimbili okusolwa ukuthi wazithenga ngemali yokwebiwa, uPresley usolwa ngokuzihlomulisa ngo-R15 million, uCarol kuthiwa inkampani yakhe yahlomula ngezindodla kule khomishini, uSelaelo usolwa ngokusebenzisa imali okwakufanele yakhe isikhungo somphakathi kodwa wazithengela ngayo unyanyavu lwemoto kwathi uSimphiwe wahlomula ngo-R500 000 ukwenza umcimbi.