Kuyasuka lokho ngohlelo iBig Brother

KULINDELEKE ukuthi uqale ngoJanuwari 11, umsindo othinta isasasa lohlelo iBig Brother Mzansi, njengoba uMzansi Magic usumemezele usuku oluzoqala ukubonakala ngalo.

Ingqikithi yalo nyaka ethi Bazozwa, kanti luzoqhubeka nokwethulwa umethuli wezinhlelo uSmash Afrika.

Kuzothi uma kuqala uhlelo athule intsha yakuleli engu-22 okuyiyona ebe senhlanhleni yokuthola ithuba lokuthi ibonakala ihleli endlini, ukuze oyedwa kubo azitholele imali engaphezu kuka-R1 million.

USmash uveze ukuthi usekubheke ngabomvu ukuthi ethule intsha ezoba yingxenye yohlelo, nokuzothi uma ingena kula bezomemezela khona izinguquko eziza nale sizini entsha.

“Kulo nyaka uBig Brother uzobe nemidlalo emisha nezogcina abahleli endlini bephapheme. Kulolu hlelo akekho ongazi ukuthi odla imali usuke eyisebenzele kanzima. Lokhu kuzokwenza nababukeli bagcine behlala bezibuza ukuthi uza nani uBig Brother isonto ngalinye.

"Kuzothi njalo ngoLwesine nangoLwesihlanu, kube khona izinhlelo, nala ngizohlala khona nasebephumile ohlelweni sibheke ukuthi yini abayizuzile ngohlelo nokunye abangakuthandanga kulo. Sizobheka okwenzekile okudonse amehlo abantu kwabakhulumisa ezinkundleni zokuxhumana, sixoxe ngakho,” kusho uSmash.

Uthe akubonayo ngale sizini ukuthi izojabulisa kakhulu kunamanye asedlule ngenxa yokuthi iza nezinguquko nokuyinto enhle abantu abathanda ukuyibona uma kuziwa ezinhlelweni ezifana nalezi.

Uveze ukuthi okunye abajwayele ukukubuzwa abantu ukuthi kwenzakalani entsheni esuke ikulolu hlelo, uma isiphumile?

“Kumele bazi ababukeli ukuthi asibalahli, uma umuntu esephumile endlini kodwa sibheka izinto eziningi kuye ngokwenzekile, sihlale naye phansi ngisho abaqhamuka esiteshini imbala ngakho kuningi okwenziwa kumuntu ngamunye ngaphambi kokuthi aye ekhaya,” kuchaza yena.

Intokazi yaseNewcastle eyadla umhlanganiso ngo-2023, uKhosi Thwala, utshele abezindaba njengoba esengomunye wabantu abasiza abazongena kulolu hlelo, nathe ubunzima ngalolu hlelo buba khona usuphuma ngaphakathi endlini kaBig Brother.

“Uma nje uphuma endlini, zintathu kuphela izinto ezikushaya kakhulu ukudideka, ingcindezi ephuma emindenini emibili osunayo okungumndeni wakho wangempela kanye nalo osuwutholile okungabalandeli bakho. Uma ungumuntu obengakwazi ukuba nesimo esihle sokuphatha imali manje usuke usubhekene nemali eningi, nokumele uthole usizo lokuthi ungayiphatha kahle kanjani ukuze ingasaphazeki,” kusho uKhosi.

Uthe yena wathola inkampani eyamsiza wakwazi ukuvalela imali yakhe khona, nokuyinto angazisoli ngayo.