UMinnie uzokhokha u-R50 000 awuthola kungafanele
UMINNIE Dlamini osevumile ukuthi uzoyikhokha imali engu-R50 000 ayithola kungafanele ngemuva kophenyo lweSIU
Image: X
UPHIKO iSpecial Investigating Unit (SIU), isifinyelele esivumelwaneni sokuthi ayikhokhe imali ayithola kungafanele umethuli wezinhlelo zakuleli, uMinnie Dlamini.
UMinnie nabanye kwatholakala ukuthi bathola imali kungafanele eyayiwuxhaso olwaluphuma kwaNational Lotteries Commission (NLC).
Inkampani eyanikwa lolu xhaso kuvela ukuthi kwakumele isebenze ekukhangiseni imidlalo ka-2016, iRio Olympic.
I-SIU iveze ukuthi uMinnie uvumile ukuthi ayibuyise le mali ayithola ngo-2016, ngaphansi kwalolu hlelo yonke iphelele njengoba ingu-R50 000.
UKaizer Kganyago okhulumela lolu phiko uveze ukuthi imali eyanikwa bonke abahlomula ayisetshenziselwanga lokho okwakumele ikwenze.
“Uphenyo lweSIU luveza ukuthi inhlangano engenzi nzuzo, iMshandukani Foundation, yathola imali engango-R24.8 million kwiNLC. Ngesikhathi ingena kuyabonakala ukuthi yabe isidluliselwa kubantu abahlukene, okukhona kubo uMinnie Dlamini, nokuyinto eyenzeka ngokungemthetho njengoba sasingekho isivumelwano esithi le mali kumele isetshenziswe ngendlela okwenzeka ngayo," kusho uKganyago.
Uthe abakujabulele ngoMinnie ukuthi ubesebenzisana nabo kulona lonke uphenyo akade belwenza, nokugcine kutholakala ukuthi le mali kwakungamele ayithole.
"Ukubuyisa kwakhe le mali kungenye yezindlela zeSIU ezinkulu zokubuyisa yonke imali eyatholwa abantu kungemthetho. Sizimisele ukuthi wonke umuntu othinteka ezimweni ezifana nalezi sikwazi ukuthi sibathole futhi bakwazi ukuthi babuyise le mali noma babhekane nengalo yomthetho, asikhethi ukuthi umuntu ukweleta malini," kuchaza uKganyago.
Uthe yonke imali abazoyiqoqa izophindela emuva esikhwameni sakwa-NLC nezosetshenziswa ukuthi itholwe abantu abayidingayo ngempela, ukuze bakwazi ukuthi benze umsebenzi odingwa umphakathi.