Sekumi ngomumo ngomgcagco kaKhuzani
Sekubhekwe esigcawini eMandaba kuKhuzani noNonduduzo kulandela ubukhazikhazi bomshado omhlophe ngoLwesine
Image: Facebook
UZOPHENDUKA idili likaMkhipheni umgcwagco wesihlabani somculi kamaskandi, uNkosikhona Innocent "Khuzani" Mpungose nentokazi yaseManyiseni, eJozini, uNonduduzo Mathenjwa eMandaba, eNkandla, ngoMsombuluko.
Abantu kulindeleke ukuba babulale inyoka njengoba kulindeleke namabutho azobe eqhamuka ezindaweni ezihlukahlukene emuva komhlangano obubanjwe yilo mculi nabadidiyeli bezinduna. Izithameli zizokwehlisa inyama yezinkomo ezingaphezu kuka-20 ngeziphuzo ezingangamanzi okuphala izikhumba nangedili lomculo.
Kubaculi abazobe bendisa ngalolu suku ngoNjabulo Langa, Quality Biyela, Menzi, Inkosi Yamagcokama, Muntuyenziwa, Ndoni, Saliwa, Mjolisi, Msezane, Ntencane, Thokozani Langa, Qhoshangokwenzakwakhe, Khaza, Mabhilidi, Mkhulekelwa, Thandeka Hadebe, Big Zulu, Siya Shezi, Mduduzi Ncube, Lwah Ndlunkulu, Qoqa, Njoko, Mayoghurt, Falabo, Gandaganda, Mlabalaba, Ali Mgube, Navigator, Mdumazi, Gqizile, Jumbo, Gadla nabanye.
Kubantu abaphekise lo mculi kubalwa usomatekisi uMavava Sikhakhane nosomabhizinisi uVezokuhle Nala weMathole Funeral Services abakhiphe yonke inhlobo yotshwala obumba eqolo obubiza imali engaphezu kuka-R200 000 neziklabhu eziyisishiyagalombili.
UKhuzani uqale ngokukhehla futhi wambesa uNonduduzo ngeSonto eledlule. Isolezwe lithole ukuthi umkhehlo wandulelwe yisigaba somcimelo lapho khona umakoti ubeyovalelisa koninalume kwaFakude.
IZINKOMO okusaphekiswe ngazo uKhuzani ngabantu abahlukahlukene
Image: FACEBOOK
UKHUZANI
Image: FACEBOOK
UTSHWALA obebulethwe wuMavava Sikhakhane noVezokuhle Nala
Image: FACEBOOK
UMNUZ Bonie Ngubane noWelile Mchunu benikeza uKhuzani isamba sika-R50 000
Image: SIGCINIWE