Bazozitika ngomculo ongasoze wabuna eMlaza

INTAKA ibekelwe amazolo kubathandi bomculo ongasoze wabuna njengoba bezozitika nge-jazz eMax's Lifestyle eMlaza ngeSonto kusukela ngo-12 emini.

Kuleli dili lomculo opholile kuzobe kunandisa uLinda Gcwensa, Umafikizolo, Mdu Mahlobo, Fanie Dick, Mthobisi Mthalane, Lihle Ngongoma, Tutu Grooves, Simphiwe Cele, DJ Muntu (The Master Blaster), Zisto we-East Coast Radio, Sandile Mkhulu, Ricky, uMzokoloko weVuma FM, Collen Zondo weGagasi FM noBra T.

Umgqugquzeli womcimbi uNje Buthelezi uthe ngawoi uhlose ukubhulela amazolo indumezulu ye-festival ezoba seKing Zwelithini Stadium eMlaza ngoMashi 28. Uthe umcimbi kuzobe kungokwesikhombisa wenziwa.

Nakuba kuwona kusuke kudlalwa izingoma ezipholile kodwa uNje uthe kulokhu ubhansele abathandi bobumnandi ngomculi kamaskandi oshisa izikhotha kulezi zinsuku ngenoni elithi Uyoncengwa Unyoko, uMafikizolo.

Yize iningi lazi le ngoma kodwa uMafikizolo ngeke aphume esteji engawaculanga amanye amanoni okubalwa kuwo elithi Ngimile Mpo nelithi Ngathi Nguye.

NoLinda Gcwensa uyaziwa ngamanoni athi Ngizokuthanda, I Choose nelithi Zitotose. UDJ Muntu waziwa kakhulu ngamanoni amzukwane futhi angasoze abuna awaqhulula emicimbini yalolu hlobo. 

UNje unxuse abathandi bomculo we-jazz, RnB ne-soul ukuba baphelele ngobuningi babo. Uthe amathikithi azotholakala esangweni kodwa wacela izithameli ukuba zingawaphathi ama-coolerbox ngoba azobe engavumelekile.