Kugiye abasanda kufika emculweni wokholo kumaCrown
UMCULI wokholo futhi ongumbhali wazo, uMnqobi Nxumalo, ozakhele igama kwiJoyous Celebration ube ngomunye wabaculi abathole izindondo ezingaphezu kweyodwa emcimbini amaCrown
Image: Facebook
ABACULI bokholo abasanda kungenisa kulo mkhakha yibona abenze ezibukwayo emcimbini amaSABC Crown Gospel Music Awards, okade ese-ICC, eThekwini, izolo.
Kulo mcimbi obukhuza ibuya KwaZulu-Natal, emuva kweminyaka, uMusa Yende noMnqobi Nxumalo yibona abathole izindondo ezingaphezu kweyodwa. Kunandise kuwo abaculi abanohlonze okubalwa kubo inkakha uDkt Derrick Nzimande, Jabu Hlongwane, Londiwe Sphe Nxumalo, Sindi Ntombela, Mam Faith Khanyile nabanye.
UMCULI wokholo uMusa Yende obeqokwe emikhakheni emine emcimbini wamaCrown izolo
Image: Facebook
Intokazi esencane uMusa Yende ikhale yemuka nezindondo ezimbili okukhona kuyo ebalulekile uma usafika endimeni yomculo.
Uthole indondo yeBest Newcomer waphinde wahlabana ngendondo yeBest Collaboration engomeni ethi Amandla Amasha apike kuyo insizwa yaseMpumalanga eyazakhela igama ohlelweni ama-Idols SA, uBrenden Praise.
UMnqobi naye ukhale wemuka nezindondo ezibalulekile okukhona kuzo iBest Album neBest Song Writer.
Inkakha yomculi wase-Eastern Cape owazakhela igama ngeminyaka yama90s, uLusanda Mcinga, ihlonishwe ngendondo yeLifetime Achievement Award.
UMbhishophi uMpendulo Nkambule okunguye umdidiyeli omkhulu wemiklomelo, ubonge bonke abaqhubeka nokubaxhasa ukwenza lo mcimbi, wathi lokhu kukhombisa ukuthi abantu basawuthanda umcimbi futhi nabo kubakhombise uthando.
“AmaCrown Gospel Music Awards asebuyile eThekwini, lapho kuqale khona konke. Abantu bakhombisa ukujabula okukhulu ngomsebenzi owenziwa uZanele Mbokazi Nkambule, unkosikazi wami ongasekho,” kusho uNkambulo.
Uthe bayabonga kuhulumeni wakulesi sifundazwe ngokubambisana nabo nabo bonke abaxhasi.
Abanye abahlabane kulo mcimbi ilaba:
Best Male: Sbu Noah
Best Female: Mmatema
Best Group: The Jesus Collective
Best Traditional: Dumi Mkokstad
Best Praise: Kgaogelo Kekana
Best Worship: Tebs David
Best Contemporary: Brenden Praise
Best Live Event: The Jesus Collective
Best Jazz: L'wei Netshivhale
Best Video: Sbu Nzima
Best Accapela: The Original Umlazi Choir
Best Clap And Tap: Isaac And The Mighty Messengers
Classic Of All Times: Pastor Rudolf Mabasa
Best Itende: Sihle Khumalo
Best Rap: Andrae Jacobs
Best of Africa: Nothando Hlophe
Best Producer: Siyanqoba Mthethwa