Kubuyekezwa ukubuya kohlelo i-Top Billing ngemuva kweminyaka eyisithupha
UBONANG Matheba wayeyingxenye yohlelo iTop Billing okuzothi ngasekupheleni kwale nyanga kukhonjiswe isiqephu esikhethekile esisha salo
Image: Instagram
KULINDELEKE ukuthi sindonse amehlo abaningi isiqephu esiyingqophamlando sohlelo olwalukhombisa imizi nezindawo eziphambili kuleli zosaziwayo nezosopilitiki iTop Billing.
Lolu hlelo luzokhuza ibuya ngesiqephu esikhethekile esizobe sisakazwa eKapa, ngoNovemba 27, kwiS3.
I-Top Billing yaqedwa abakwaSABC ngo-2019, ngemuva kokuthi bekhale ngesimo esingesihle sezezimali.
Maps Maponyane
Image: Instagram
Yize lwase lukhonjiswe iminyaka engaphezu kuka-20 kodwa ukuqedwa kwalo kwaba yisinqumo iSABC eyaveza ukuthi bekumele isenze ngenxa yesimo esingesihle somnotho.
UCaroline Phalakatshela weSABC uthumelele abezindaba isimemezelo esincane eziveza ukuthi isiteshi iS3 nenkampani yokuqopha iCardova Productions bazokwenza umcimbi wokujabulela lesi siqephu eKapa, nabathanda ukuveza lezi zindaba ukuthi kwaziwe emphakathini ukuthi kukhona okwenziwayo ngokubuyisa lolu hlelo.
"Uhlelo lolu obelukhombisa izinto zakuleli okuyizona ezingathathelwe kwamanye amazwe. Ngesonto elizayo, kula sizokwazi khona ukuthi simemezele okuphelele okuthinta lona, ikakhulukazi okuthinta ukubuya kwalo emoyeni nezinye izindaba esizozimemezela ngezinhlelo nemidlalo eza eziteshini zethu ezihlukene," kusho uCaroline.
Lolu hlelo lungezinye ezenza kwaduma osaziwayo abahlukene kuleli asebezakhele igama okukhona kubo uBonang Matheba, Ayanda Thabethe, Lorna Maseko, Maps Maponyane nabanye.
Izinkakha okukhona kuzo abashadile, uRomeo noBasetsana Kumalo, nabo bazakhela igama ngokuba yingxenye yalolu hlelo.
Ezinkundleni zokuxhumana abanye bakujabulele ukubuya kwalolu hlelo, abanye bakhala ngokuthi ngendlela oludinga kuhanjwe ngayo kuqoshwa izindawo eziphambili, luzoqhubeka nokuchitha imali eningi engasiza ukulungisa izinkinga ezikhona eSABC.