Injabulo kumenyezelwa uhlelo oluzohlanganisa abesifazane base-Afrika
ABESIFAZANE abaqhamuka emazweni ahlukene e-Afrika abazobonakala ohlelweni iThe Real Housewives Ultimate Girls Trip: Africa ezoqala ngenyanga ezayo kwiShowmax
Image: Sithunyelwe
ABATHANDI bezinhlelo zabesifazane abadla izambane likapondo nesezizakhele igama ezwenikazi i-Afrika sebelubheke ngabomvu usuku lokuqala kwesizini yesibili yohlelo iThe Real Housewives Ultimate Girls Trip: Africa.
AbakaShowmax bamemezele ukubuya kwesizini yesibili yalolu hlelo ezoqala ngoNovemba 28 kuthi ngoNovemba 29 iye kuMzansi Magic.
Kulo kuzobonakala abesifazane abagqama ohlelweni iThe Real Housewives of Durban uJojo Robinson, Annie Mthembu noNqobile "Angel" Ndlela.
UMadam Evodia noChristall Kay abagqama ohlelweni iThe Real Housewives of Johannesburg nabo bazoba yingxenye yalo.
Bonke bazobonakala befika edolobheni iRio de Janeiro, eBrazil beyoshaywa wumoya.
Bazobe sebehlangana nezintokazi uZena Nyambu noDr Catherine Masitsa abazakhela igama ohlelweni iThe Real Housewives of Nairobi, uPrincess Jecoco owagqama ohlelweni iThe Real Housewives of Abuja noMariam Adeyemi Timmer oke wabonakala ohlelweni iThe Real Housewives of Lagos.
Bonke laba besifazane bazohlangana endlini kanokusho iParanaguá, nokulapho bezozama ukuba nobudlelwane bajabulele ubuhle bendawo abakuyo, baxoxe nangempilo yabo.
Umsunguli walolu hlelo uGraeme Swanepoel uthe lolu hlelo lungaphezu nje kokuthi lugqamise impilo yalaba besifazane kodwa luqhakambisa nempumelelo yabesifazane nase-Afrika njengoba kulo kugqama namasiko abakhulele kuwo, imisebenzi abayenzayo nempilo yabo ephezulu.
“Kuzoba okokuqala ukuthi lolu hlelo luhlanganise abesifazane abanye esikade sabagcina kwithelevishini, baphinde bazosho ukuthi kwenzekani empilweni yabo. Okunye okusha wukuthi kuzohlangana abesifazane base-Afrika hhayi nje baseMzansi kuphela njengoba sabona ngesizini edlule. Bazoxoxa ngezinto ezibehlele empilweni yabo ngokuhlukana, kuningi ababukeli okumele bakulindele njengoba kuzoshunqa uthuli ngokuhamba kwesikhathi uma sebehleli ndawonye. Imimoya izophakama kuvele kucace ukuthi laba besifazane bangobani ngempela,” kusho uGraeme.
Uthe abangabazi ukuthi abathandi balolu hlelo sebekubheke ngabomvu ukuthi luqale njengoba bese kunesikhathi belulindele.