Kuvulwe ithuba kwabafuna ukuba sohlelweni iBig Brother Mzansi
U-SWEET Guluva owine ohlelweni iBig Brother Mzansi ekuqaleni kwalo nyaka
Image: Instagram
LIVULWE izolo, ithuba kwabafuna ukuba yingxenye yohlelo iBig Brother Mzansi isizini yesithupha okulindeleke ekuthi iqale ngasekupheleni kukaJanuwari ngonyaka ozayo.
AbeMzansi Magic baveze ukuthi intsha yakuleli eneminyaka esuka ku-21 ingazama inhlanhla ekubeni yingxenye yalolu hlelo isiqubulo salo esizobe sithi Vuk’ubangene!
Kubantu abathe bangazama inhlanhla baveze ukuthi akube abanamakhono ehlukene kwezobuciko angabasiza ohlelweni. Imininingwane yokungenela itholakala ku-https://www.dstv.com/.
UShirley Adonisi obhekele izinhlelo zakuleli kwiM-Net, uveze ukuthi uhlelo iBig Brother Mzansi lungezinye zezinhlelo eziqhubekayo nokuhambisana namasiko ahlukene akuleli njengoba zithinta intsha nqo.
"Uhlelo oluveza ukuthi intsha yakuleli iphila impilo ekanjani usuku nosuku, aluvezi okungekhona, sijabule ukuphinde simeme intsha ukuthi izozama inhlanhla yokuba ingxenye yalo. Akulona uhlelo lolu ongathi lugcina ngokujabulisa abalubukayo nalabo abayingxenye yalo kodwa liletha ukukhuluma okuhlukene uma kuziwa ezindaweni abakulo abaqhamuka kuzo, ubudlewano obuba khona, ukuhlukana kwemibono kodwa kunjalo lusuke lubungaza nezizwe nezilimi esinazo kuleli nentsha eqhamuka ngaphansi kwazo," kuchaza uShirley.
Uthe indlela abalwenza ngayo nendlela elujatshulelwa ngayo ababukeli balo, kuvela ukuthi lungolunye lwezinhlelo ezihamba phambili ngababukeli futhi luvulele intsha amathuba amaningi okuthi igqamise amakhono ayo, bese ivulekelwa amathuba ahlukene.
USmash Afrika kubukeka sengathi uyena ozokhuza ibuya azoba umethuli walo njengoba ezinkundleni zokuxhumana kunguyena obenza isimemezelo sokuvuleka kwaleli thuba.
Ozodla umhlanganiso kulindeleke ukuthi ahambe nemali engaphezu kuka-R1 million, nozobe elandela entsheni eyadla umhlanganiso eminyakeni edlule okukhona kuyo uSweet Guluva, McJunior, Mpho Wa Badimo nabanye.