Ukhuza ibuya umdlalo Isibaya owagila izimanga
UKHUZA ibuya kuMzansi Magic kusuka namhlanje umdlalo Isibaya
Image: Sithunyelwe
UVOTELWE njengomunye wemidlalo abakuleli abathi ayibuye kwithelevishini umdlalo Isibaya, okuzothi namhlanje uqale ukukhonjiswa kuMzansi Magic (161), ngo-6.30 ntambama.
Lokhu kwenziwa abakwaM-Net njengoba isiteshi uMzansi Magic sigubha iminyaka engu-15 saba khona.
AbakwaM-Net benze isimemezelo sokuthi ukugubha le minyaka bacela ababukeli babo bavotele umdlalo abafuna uphinde ubuye bawujabulele esiteshini sabo.
Isibaya yiwona mdlalo ohambe phambili ngamavoti.
UShirley Adonisi, ongumqondisi wemidlalo yakuleli kwaM-Net, uthe Isibaya saba ngomunye wemidlalo eyaletha umehluko esiteshini sabo, njengoba seza nokuningi kwanabo ababengakulindele.
"Umdlalo lona owawugcwele izinto ezihlukene ezithinta amasiko futhi wafike washitsha okuningi ezinhlobeni ezihlukene zemidlalo yakuleli eyayikhonjiswa ngaleso sikhathi. Njengoba sigubha iminyaka engu-15 njengesiteshi, kuyasijabulisa ukubona ababukeli bethu bejabulela nathi imidlalo ehlukene ebe yingxenye yempilo yethi. Ukubuyisa lo mdlalo sikwenzela bona ababukeli bethu ababe nathi kusuka ngosuku lokuqala kulolu hambo lwethu," kuchaza uShirley.
Uthe ukubuya kwalo mdlalo kuzobakhumbuza abalingisi okukhona kubo uBheki Mkhwane olingisa indawo kaSamson Ndlovu, Siyabonga Thwala (Mpiyakhe Zungu), Nomzamo Mbatha (Thandeka Zungu), S’dumo Mtshali, (S’busiso Ndlovu), Ayanda Borotho, (Phumelele Zungu) Celeste Ntuli (Siphokazi Zungu) noThembi Nyandeni odlala indawo kababekazi ongabhedelwa emndenini wakwaZungu, uMkabayi Zungu.
"Esizophinde sikukhumbule ngokubuyisa lo mdlalo ukuthi sibungaza impilo yabalingisi ababa yingxenye yawo abangasekho emhlabeni okukhona kubo uMenzi Ngubane olingisa indawo kaJudas Ngwenya, Andile Gumbi (Zweli Shezi) noMam’ Nandi Nyembe (Gog’Mkhithi). Umdlalo lona owadlala isikhathi eside njengoba wakhonjiswa amasizini angu-8 ngemuva kokuqala ngoMashi wango-2013. Siyaziqhenya nangokuthi wathola izindondo ezihlukene emicimbini ehlukene ehlonipha amaciko emkhakheni wokulingisa nokuyinto enkulu," kusho yena.
Lo mdlalo okhiqizwa iThe Bomb! Productions uyisiqalo seminye ezokhuza ibuya kulesi siteshi njengoba isaqhubeka imincintiswano yokugubha iminyaka lesiteshi saqala.