Baxolisele uTLB nge-video esabalale ezinkundleni zokuxhumana bedlonya utshwala
Star boy UMDLALI we-Orlando Pirates, uMbekezeli Mbokazi, osekugxekwe osaziwayo okukhona kubo uBig Zulu ngokubonakala behlezi naye bephuza utshwala
Image: Alche Greeff/BackpagePix
UMREPHA waseBergville, uBig Zulu usephumele obala waxolisa njengoba begxekwe kakhulu kusabalala i-video ezinkundleni zokuxhumana benomdlali we-Orlando Pirates uMbekezeli Mbokazi(19) odume ngelikaTLB.
Kule video bekubonakala amaciko adume nasemculweni kamaskandi ehleli nabo bevuma ingoma, kugcwele utshwala namantombazane.
UMREPHA uBig Zulu osexolisile ngokubonakala bephuza utshwala ku-video esabalale ezinkundleni zokuxhumana
Image: Sithunyelwe
UBig Zulu ubonakale nendondo kaMbokazi asanda kuyithola emqhudelwaneni iMTN 8, ebingempelasonto.
Abantu ezinkundleni zokuxhumana basole laba ngokuhudulela uMbokazi etshwaleni nakubantu besifazane yise esemncane esazakhela igama ebholeni.
UMcebo Ntombela uthe: “Ake nimvule amehlo lo mfana aphume kulaba bantu bazoqeda ngaye”.
UNtombi Skhosana uthe: “Ingane eneminyaka engu-19, oBig Zulu badala yenziwelani nje le nto, kunama-video isizocushwa ngento encane”.
USyabonga Syah Mabaso uthe: “Seningavika phela ngoba niyamthanda kodwa akekho ongaboni ukuthi uzidakelwe umfana kagogo”.
UBravo Sanzoman uthe: “TLB ugogo wakho uzokhala izinyembezi uma ebona le video. Kungakuhle uziphathe kahle abaculi nabadlali bebhola abantu abangafani. Ziqhelelanise kulaba, ikakhulukazi nivela ngandawonye ngeke bakuthande”.
UBig Zulu uveze ukuthi uyaxolisa ngokubonakala kule video okukhona ubudedengu kuyo.
“Ngixolise ngokubhala lesi sikhangiso ebusuku. Ngiyabona la enkundleni zokuxhumana kusabalale i-video sinabafowethu sivuma ingoma kukhona notshwala etafuleni. Cha iqiniso lithi icala likhona futhi likhulu ngendlela ekuvela ngakhona ku-video kube nobudedengu obukhulu kwabanye abafowethu sicela ukudlulisa ukuxolisa kakhulu.
"Umfowethu uTLB impeleni akanacala, ubekade edlula esitolo ebesikuso, baqeda basibona ngaphakathi. Ube esesondela nezinsizwa abehamba nazo bebingelela bathola thina sizivumela ingoma wabe naye esevuma kancane ngoba phela usinga luyavuka futhi angikaze ngimbone ephuza, cha angizange," kusho uBig Zulu.
Uthe ngemuva kokuvuma ingoma ube esephuma ehamba.
“Ngicela ukudlulisa ukuxolisa kakhulu indlela ekwenzeke ngakhona, kube nobudedengu nesibonelo nje esingesihle. Sicela ukudlulisa uxolo siyazithoba kakhulu. Siyaxolisa kubathandi bezemidlalo nakumndeni wakhe nakuwo wonke umuntu. Siyaxolisa kakhulu!” kusho yena.
UNgizwe Mchunu noQuality Biyela ngabaye abaxolisele uMbokazi ngalokhu okuvelile, bathi akabulokothi utshwala.