ISilo sithembise uMaMdluli eMkhosini woMhlanga
UNDLUNKULU weSilo uMisuzulu uSihle Mdluli amthembise umshado ngoMsombuluko eMkhosini woMhlanga oqhubeka eSwatini
Image: Facebook
KUBE negidigidi ezinkundleni zokuxhumana kusabalala ama-video iSilo saMabandla onke, uMisuzulu kaZwelithini Zulu, sithembisa umshado uNdlunkulu waso wesihlanu uSihle Mdluli waseMpumalanga, ebukhosini baKwaMdluli.
Lokhu kwenzeke eMkhosini woMhlanga oqhubekayo esigodlweni iLudzidzini, eSwatini, ngoMsombuluko.
UNdlunkulu uMaMdluli uqale ukugqama emicimbini yaseNdlunkulu kulo nyaka nokuphindwe kwahamba izithunywa ziya ebukhosini baKwaMdluli, ziyosho ukuthi sekukhona ubuhlobo obukhona phakathi kwalezi zizwe zombili.
ISILO uMisuzulu kaZwelithini noNdlunkulu uSihle Mdluli okube negidigidi ezinkundleni zokuxhumana bebonakala besina bobabili eMkhosini woMhlanga eSwatini
Image: Facebook
EMkhosini woMhlanga obungoMgqibelo, eMachobeni, uNdlunkulu uSihle ubonakale esina nezintombi phambi kweSilo.
UMntwana uThulani Zulu okhulumela iSilo uMisuzulu uveze ukuthi okwamanje angeke akwazi ukuqinisekisa obekwenzeka ngaphandle kwakuleli njengoba kungekho asakutshelwe yiNgonyama ngalo mcimbi wangoMsombuluko.
“Kunzima ukuphawula okwamanje ngoba akukho engisakutsheliwe ngalo mcimbi, okukhulu ukuthi awenzakalanga nakuleli, kungenzeka futhi kusetshenziswe ubuchwepheshe bamanje bezinkundla zokuxhumana, akuyona into eyenzeke ngempela,” kusho uMntwana uThulani.
Ezinkundleni zokuxhumana abantu babongele iSilo noNdlunkulu ngaleli gxathu asebelithathile.
UNoxolo Precious Mthembu uthe “Ngathi uMaMdluli uhamba yedwa”.
UMabel Jali uthe: “Ngiyaqala ukubona iNdlulamithi igiya, okuhle okumhlophe Hlangalomhlabathi, Ndlulamithi yamakhosi.”
USbekezelo Nosi uthe: “Saze sayithanda into wasibuyisa isithunzi ndlunkulu wethu.”
USboniso Dhlamini uthe: “Nakho-ke Silo sethu, uyabona ke manje ibambe kahle.”
USmangaliso Jobe uthe: “Siyabonga Bayede ukuba nomama siyisizwe, uNkulunkulu ayivikele njalo iNdlulamithi.”
UNdoni MaShabane Zulu uthe: “Siyabonga Ndabezitha waligeza igama lakho.”
Isolezwe ngomthombo walo osondelene neNdlunkulu lithole ukuthi ngoMgqibelo eMkhosini woMhlanga ozoba seMashobeni, kulindeleke ukuthi Indlulamithi yaMakhosi imemezele uMaMdluli njengomunye woNdlunkulu bayo esizweni.
Ngemuva kwalokho, kuyobe sekuphuma abakhongi beyocela isihlobo esihle, ebukhosini baKwaMawewe la kuzalwa khona uNdlunkulu, ukuze kuqhutshekwe ngendlela yesiko nomshado wabo.
"Lokhu okwenzekile kuchaza ukuthi sekuyisiqalo sendlela yabo eya emshadweni," kusho umthombo.