Kuvuthwa izinhlelo zokubuyisa izinhlelo okukhona kuzo ama-Idols SA
UDenim Richards onenkampani i-Opulent Entertainment Group osesayinde isivumelwane neyakuleli iPrimedia ukubuyisa izinhlelo ezinesasasa okukhona kuzo ama-Idols
Image: Sithunyelwe
INKAMPANI esikhiqize izinhlelo ezihlukene ezikhonjiswa kwaSABC, okukhona kuzo iDeal or no Deal SA, iMasterchef SA, iWheel of Fortune nezinye, iPrimedia Studios isimemezele ukuthi isisayinde isivumelwano nenkampani yaphesheya kwezilwandle i-Opulent Entertainment Group, kaDenim Richards ukukhiqiza ezinye zezinhlelo ezike zaba nesasa kuleli.
Ezinhlelweni ezintsha okulindeleke ukuthi baqale basebenze ukuzenza kabusha kubalwa oluvundulula amakhono abaculi ama-Idols SA, Project Runway, The Voice neDancing with the Stars.
Zonke lezi zinhlelo zake zakhonjiswa esiteshini esikhokhelwayo iM-Net kodwa zagcina zivaliwe ngemuva kwezinqinamba ezihlukene ezabikwa kuzo.
Ekhuluma ngalesi sivumelwano uJan du Plessis wePrimedia uthe kube umzuzu ojabulisayo ukuthi bafinyelele esivumelwaneni esifana nalesi ukuthi bakwazi ukuvundulula amakhono amasha kuzona zonke lezi zinhlelo.
"Lezi ngezinye zezinhlelo ezihamba phambili emhlabeni kuwona wonke amazwe eziwenzayo. Ngakho nathi sibona ithuba lokuthi sithole inkakha emkhakheni wokukhiqiza ezaphesheya kwezilwandle ukuze izosebenza nathi ukuze silethe into okuzoba ngathi intsha emehlweni ababukeli, abakaze bayibone. Ngakho sithe sihlangana sabona ukuthi sinombono owodwa ngekusasa lentsha yase-Africa ukuthi kumele siyenzele amathuba afana nalawa futhi maduzane izinhlelo esizobe sizikhiqiza zizobe zikwelinye izinga," kusho uJan.
UDenim uveze ukuthi izinhlelo zalolu hlono eziwukhiye ekuthuthukiseni umnotho womkhakha abakuwo wokukhiqiza izinhlelo zethelevishini ezigcina zithathwa zidayiswe kwamanye amazwe kungene imali emazweni azisungulile.
“Ukuze umkhakha wezokungcebeleka uhlale udonsa amehlo abantu kudingeka ukuthi njalo kube khona ukusebenzisana ekwenzeni izinhlelo ezihlukene. Amathuba afana nalawa uma eqhamuka akumele ayekwe. Ngakho ukuphinde senze lezi zinhlelo nePrimedia Studios kusho lukhulu njengoba bengenye yezinkampani ezinkulu e-Africa ebezikhiqiza izinhlelo zethelevishini ezithandaywo," kuchaza yena.
Uthembise ukushintsha ikusasa labakhiqizi bezinhlelo kuleli kanjalo nendima yezokungcebeleka e-Africa.