UNandipha noBester bavimba iqophamlando ngempilo yabo
BALUFAKE enkantolo eleqophamlando elikhuluma ngempilo yabo elizokhonjiswa kuNetflix, uThabo Bester noNandipha Magudumane
Image: Sigciniwe
SEBEPHINDE benza imizamo yokuthi kungaveli lutho oluthinta impilo yabo bengakaboshwa, oThabo Bester noDkt Nandipha Magudumane, abafake isicelo enkantolo sokumisa isiteshi iNetflix ukuthi ingasakazi lutho oluthinta bona.
Lokhu kulandela ukuthi iNetflix imemezele ukuthi izosakaza iqophamlando elikhuluma ngothando lwalaba kuze kube bayaboshwa, elizokwaziwa ngeBeauty and the Bester.
Leli qophamlando kulindeleke ukuthi liqale ukukhonjiswa ngoSepthemba 12, 2025.
Lezi zithandani ngokwamaphepha abameli, ziveze ukuthi iqophamlando leli liqukethe okungelona iqiniso, okuhlambalazayo nokungenabo ubufakazi ezintweni ezizovezwa okuyinto edicilela phansi amalungelo abo.
Ukulalelwa kwaleli cala kulindeleke ukuthi kube ngoSepthemba 9, sekusele izinsuku ezintathu nje kuphela ukuthi liqale likhonjiswe kwithelevishini.
AbakwaNetflix baveze ukuthi iqophamlando liphethe zonke izigemegeme kusuka empilweni ephezulu uDkt Magudumane ayeyiphila, njengoba abaningi babesebenzisana naye kuze kuya ekuthandaneni nosolwa ngokuba umbulali nomdlwenguli, uThabo Bester, okuyinto eyathusa abaningi.
“Uke waba ngomunye wabesifazane igama labo ebeliphezulu emkhakheni wamabhizinisi ngisho ezinkundleni zokuxhumana ngenxa yokuthi impilo yakhe ibibonakala ihamba kahle. Kodwa konke kwashabalala ngesikhathi kuvela indawo ayidlalile ngesikhathi kuzanywa imizamo yokukhipha uBester ejele. Kwagqama ukuthi ubephila impilo embili. Iziqephu ezintathu zaleli qophamlando zizongena zigxile ezintweni ezathusa ababukeli ngo-2023,” kusho abakwaNetflix.
Bathe iziqephu zizohamba ngezigaba ezehlukene zempilo yakhe, kusukela engakaboshwa kuze kugcine esesejele.
Esikhangisweni abasanda kusikhipha, sikhombisa amanye amalungu omndeni alaba nabangani babo okukhona kubo ubaba kaNandipha, uZolile Cornelius Sekeleni, uPearl Thusi noPenny Lebyane.
Phambilini, uBester noDkt Magudumane bazama okwenza okufanayo bezama ukuvimba iShowmax ukuthi yenze uhlelo ngempilo yabo kodwa inkantolo yabachitha.