Kugqame iphinifa kugujwa olwabesifazane eVryheid
BEBEBAHLE kanje abesifazane abebesemcimbini Inzalabantu Music Experience eVryheid njengoba bekugujwa usuku lwabantu besifazane ngoMgqibelo
Image: Sithunyelwe
KUPHOXE ukuphela kwesikhathi emcimbini Inzalabantu Music Experience, okuwumcimbi obuwenziwe yinhlangano engenzi nzuzo Ingezo Yamabhinca, inhloso yawo bekuwubungaza abantu besifazane ngosuku lwabo ngoMgqibelo, eVryheid.
Lo mcimbi ububanjelwe enkundleni yezemidlalo iCecil Emmet, nalapho abesifazane abebehlobe ngamaphinifa bebephume ngobuningi babo bezojabulela umculo wabaculi okukhona kubo uThobekile, AmaYellow Bone, Bahubhe, Dumakahle, Gatsheni, Bonakele, Thokozani Langa nabanye.
AmaYellow Bone
Image: Sithunyelwe
Bekukhona abaholi bamabandla ahlukene okukhona kubo uChaplain ehhovisi likaNdunankulu uLungi M.
Abaculi abaningi benze isiqiniseko sokuthi abesifazane abebekhona babashiya bejabule esteji ngezingoma zabo nangemidanso ehlukene.
ZINGENE ngengoma kanje iziMeya okukhona kuzo uMnuz Michael Khumalo waseZululand noMnuz Sifiso Mkhwanazi waseBaqulusini ngesikhathi kunomcimbi Inzalabantu Music Experience, okuwumcimbi obuwenziwe yinhlangano engenzi nzuzo Ingezo Yamabhinca
Image: Sithunyelwe
UBahubhe ushaye indlamu yakhe ehambisana nemidanso ehlukene. AmaYellow Bone nawo enza ezibukwayo ngomdanso. Bashiye abaningi besafuna impinda.
Okunye abakwenzile wukukhuthaza abesifazane ukuthi baqhubeke nokuzimela bahambele phezulu njengoba kuyibona ababambe amakhaya.
UThobekile uveze ukuthi angajabula ukubona umcimbi walolu hlobo uba khona njalo eVryheid ukuhlanganisa imbokodo.
“Ngiyacela ukuthi uMasipala waseBaqulusini kanjalo nowaseZululand, baqhubeke nokuxhasa imicimbi yalolu hlobo. Bukani nje nibahle kanjani sihlangene nje ngokuzijabulisa. Ngonyaka ozayo umcimbi awubuye siphinde futhi sizojabula sonke,” kusho uThobekile.
Kuwo kwezinye izikhulu ebezikhona kubalwa iMeya kaMasipala waseBaqulusini uMnuz Sifiso Mkhwanazi noMnuz Michael Khumalo ohola uMasipala waseZululand.
UMkhwanazi uthe bakujabulele ukuthi babe nomcimbi walolu hlobo abathemba ukuthi ngawo bazokhuthaza abesifazane ukuthi baqhubeke nokuhola emiphakathini futhi babasize ukuze babe ngabaholi emakhaya abaxosha ikati eziko.
UMCULI wasoPhongolo uGatsheni uyena ovale umcimbi sekumnyama kodwa abesifazane besagcwele phama kule nkundla
Image: Sithunyelwe
“Thina okwethu wukuthi sibakhuthaze abesifazane njengoba sebehlangene kanjena ukuthi bavuselele ukutshala ukuze bondle imindeni yabo. Okunye wukuthi sibakhuthaze ukuthi bangazibukeli phansi kukho konke abakwenzayo,” kusho uMkhwanazi.
UKhumalo uthe usuku olufana nalolu lumkhumbuza abesifazane abaphila kudala nabazala abaholi abahlukene abakhona manje nabangasekho.
Uthe abesifazane abangavumi ukubukelwa phansi futhi bazizwe bengelutho njengoba lilikhulu igalelo labo emphakathini.
UTHOKOZANI Langa ubesemacikweni abenandisa kulo mcimbi
Image: Sithunyelwe