Abadidiyeli beHomecoming bathi izosusa umsindo
UTHEMBINKOSI Mthembu ozolingisa indawo ephambili emdlalweni othi Homecoming ozoqala ngasekupheleni kukaJulayi kuMzansi Wethu
Image: Isithombe: Sithunyelwe
BATHEMBISA lukhulu abasunguli bomdlalo, iHomecoming, okulindeleke ukuthi uvale isikhala somdlalo, Isibongile and the Dlamini’s, obukhonjiswa kuMzansi Wethu (163), ngo-6.30 phakathi nezinsuku.
Umdlalo Isibongile kulindeleke ukuthi ufinyelele emaphethelweni ngoLwesihlanu oluzayo.
NgoJulayi 28 kuqale iHomecoming.
UMPUME “Six” Nyamane ozolingisa indawo ephambili kaZethu Hlongwane emdlalweni iHomecoming
Image: Sithunyelwe
Kulo mdlalo, ozovela sengathi uqoshelwa endaweni yasemakhaya eBergvile, kuzogqama abalingisi okukhona kubo uThembinkosi Mthembu ozobe elingisa indawo kaSfiso oyiphoyisa nomelaphi wendabuko, noMpume Nyamane olingisa indawo kaZethu Hlongwane, obuya endaweni yasemakhaya ngemuva kokungawutholi umsebenzi wokuba udokotela edolobheni.
ULulu Hela, ongumqondisi walo mdlalo, uveze ukuthi lona ngomunye wemidlalo esho lukhulu kuye ngenxa yokuthi uzofundisa izinto ezithinta impilo yasemadolobheni nasemakhaya.
“Siyajabula ukwethulela ababukeli lolu hlobo lomdlalo nokungokokuqala ukuthi ngisebenze nale nkampani ewukhiqizayo, iTshedza Pictures. Sizokwethula intokazi, uZethu, esanda kuqeda izifundo zayo zobudokotela neyenze kahle kuzo futhi enamaphupho okuthi ibe ngomunye wodokotela abahamba phambili kuleli. Kodwa izinto azihambi ngendlela efisa ngayo njengoba ingawutholi umsebenzi noma nje itoho elihambisana nezifundo akade izenza. Lokhu kumphoqa ukuthi abuyele ekhaya ngoba isingekho into ayihlalele edolobheni. Kula ezithola khona esemihlabeni eyehlukene ethinta ukwelapha ngesintu nendlela yesilungu uma ehlangana noSifiso,” kusho uLulu.
Uthe uSifiso uyiphoyisa, uma eshayisa emsebenzini uba yinyanga, ephikisana nakho konke uZethu akholelwa kukho okuthinta uthando, ukwelashwa nekhaya.
“Umdlalo lona ozokhuluma nabantu abaningi kuleli. Uzothinta imizwa yabaningi uma kuziwa emasikweni abantu abakholelwa kuwo. Siyaziqhenya ukuba nomdlalo ofana nalona kuMzansi Wethu, ozoqhakambisa ubuhle basemakhaya. Ekuhambeni kwesikhathi kulo mdlalo kuzoqubuka izinkulumo ezihlukene ezithinta ukulashwa ngokwesintu nokwesilungu,” kuchaza yena.
Kule sizini yokuqala uLulu uthe abanye abalingisi abakhona ngoSipho Manzini, Khombi Phetla, Mpilo Mbatha, Khayalethu Xaba no-Amahle Khumalo.