UTshatha nengqayizivele yethuba eSun City

ISILOMO soKhozi FM, uKhathide "Tshatha" Ngobe, sizoshiyelana inkundla nezinye izintandokazi zabasakazi beziteshi ezingaphansi kwaSABC kwindumezulu yomcimbi, iZiyakhala Mo Sun City Festival eSun City Superbowl, eNorth West, ngoJuni 28.

Kulo mcimbi uTshatha osakaza uhlelo lwantambama kuKhozi, uzobe ephethe uhlelo nomsakazi weMetro FM, uSomizi Mhlongo; oweKwekwezi FM, uThandy Mamakhe; owoMhlobo Wenene FM uLusanda Mbane; noweMotsweding FM u-Amon Mokoena.

Kubaculi abazobe besina bededelana kukhona iLadysmith Black Mambazo, Dr Nothembi Mkhwebane, Ringo, Makhadzi, King Monada, Cassper Nyovest, Sjava, Mthandeni SK, Ntate Stunna, Qadasi & Maqhinga, Lwah Ndlunkulu noGeneral Muzka. Owumphathi-jikelele wemisakazo engaphansi kukaSABC, uThinasiphelele Sixaso, uthe izintandokazi zosaziwayo abangaphansi kwale nhlangano yezokusakaza eNingizimu Afrika, zizobe ziphelele ngobuningi bazo kulesi sifundazwe esesibizwa ngeBokone Bophirima.

"Bazobe bezogubha ukuba ngama-Afrika futhi sisebenza ngokuzikhandla ukubeka lo mcimbi eqophelweni eliphezulu ukuze ungalibalekile ezingqondweni. Ngakho ayikho indlela engcono engadlula lena yokuletha ikhono elingungqaphambili lakwaSABC," kusho uSixaso.

Oyinhloko yophiko oluhlela imicimbi eSun City, uNombuso Buthelezi, wengenze ngokuthi igcagcele esokeni kubo ukubona selidumela emansumpeni ngeZiyakhala Mo Sun City, emuva kwezinyanga bengalali belungiselela le ndumezulu futhi lolu hlu lwabaphathi bohlelo bodidi oluphezulu, sekuyinto yokugcina ebisezinhlelweni zabo.

"Sesikulundele ukwamukela izicukuthwane zethu ezizobe zivela kuzozonke izingxenye zezwe ukuzogubha umculo ovutshelwe eNingizimu Afrika," kuphetha uNombuso.