Intokazi yaseKZN efilimini ezokhonjiswa eMelika

INTOKAZI  elingisa indawo kaKhwezi Gasela kwiSkeem Saam, uSamukele Mkhize, ikubalingisi abaqavile efilimini yakuleli ezokhonjiswa emcimbini waminyaka yonke phesheya kwezilwandle ngenyanga ezayo.

Le filimu esihloko sithi Treasure Hunt, izobukiswa kwi-American Black Film Festival (ABFF), eMiami Beach Convention Centre, eFlorida, e-USA kusukela ngoJuni 11 ngo-8.15 ebusuku. I-ABFF wumkhosi wamafilimu ohlonishwa umhlaba wonke futhi ogxile emisebenzini yabantu abamnyama.

Uzobanjelwa kule ndawo izinsuku ezintathu. Umqondisi we-Treasure Hunt nomsunguli weCAP Studios, uChim Onyebilama, uthe ukuqokwa komsebenzi wabo ukuba ukhonjiswe edilini lamafilimu asezingeni lomhlaba, kusho lukhulu kubona.

"Ngithanda ukubonga iqhaza likaHappiness Mpase, ongomunye wophrojusa kule filimu. Siyaziqhenya ngokumela iNingizimu Afrika nokubeka umphakathi wethu ebalazweni lomhlaba. I-American Black Film Festival yinkundla eyisimangaliso yokuba sabelane ngodaba lwethu nababukeli bakwamanye amazwe. Kuyisibusiso ukuba yingxenye yalo mcimbi omqoka kangaka," kusho u-Onyebilama.

UZane, owayenguJack van Onselen kwiSidingo, uthe iTreasure Hunt yifilimu ekhuluma ngokuthatha izinqumo ezifanele empilweni.

"Yifilimu engikholwa wukuthi abantu bazoyithanda," kushaya uZane ngezinqamulelayo.

USamukele (35) wasesigodini saseMaphophoma,eMadundube, KwaZulu-Natal,  ulingisa indawo yephoyisa elinguCaptain Buthelezi. Ngaphandle kweSkeem Saam neTreasure Hunt, le ntokazi ike yalingisa indawo kaMabuyi kwiSibaya, neqavile emdlalweni weshashalazi owawuthi Madame President.

Abanye abalingisi abanohlonze abalingisa noSamukele, ngoMoopi Mothibeli waseSebokeng, eGauteng onguVusi Duma , Muzi Mthabela waseMandeni onguNgonyama, Trevor Gumbi waseMlaza onguSergeant Mvelo noZane waseGoli.

Le filimu iqoshelwe eMbo, eValley of a Thousand Hills, eThekwini lapho kuzinze khona amahhovisi eCAP Studios.