USiya Mhlongo usehlome ngoqweqwe lommeli
U-ADVOCATE Simphiwe Mlotshwa oseqinise ithimba labameli bakaSiya Mhlongo
Image: SIGCINIWE
OBENGUMSAKAZI woKhozi FM, uSiyabonga "Siya" Mhlongo, usegadla ngoqweqwe lommeli owake waba ngumqondisi ophikweni lokuShushiswa koMphakathi KwaZulu-Natal, eminyakeni eyedlule, u-Advocate Simphiwe Mlotshwa.
USiya Mhlongo
Image: SIGCINIWE
Lolu galagala lwethulwe eNkantolo yeMantshi yaseThekwini ngoLwesithathu, ngesikhathi uSiya (42) ezobhekana necala lokushaya ngenhloso yokulimaza owayeyisoka lakhe (30).
Eziwombeni abevela ngazo kule nkantolo, uSiya ubesuke emelwe nguMfundisi wodumo eThekwini, u-Attorney Skhumbuzo Mthabela. Ngaphandle kwaleli cala, uMlotshwa ubuye amele ummangalelwa wokuqala ecaleni lokubulawa komrepha uKiernan "AKA" Forbes, uLindokuhle Mkhwanazi (30).
UMlotshwa wethulwe nguMthabela njengomuntu ozomela uMhlongo kulolu daba. UMlotshwa ufake isicelo sokuba icala lihlehle ngenxa yokuthi ubethatheleke phezulu, efuna ukulandela kahle icala. Nakuba umshushisi uShenaaz Hoosen, ubengahambisani nalokho kodwa imantshi, uMhlonipheni Sibiya, igcine iphoqelekile ukuba icala ilihlehlisele uJulayi 10 no-11 ukuze uMlotshwa abe ezihlinzeka ngolwazi olunzulu ngaleli cala.
Icala lihlehla nje, bekulindeleke ukuba ithimba labameli likaSiya lipheke ngemibuzo ummangali owethule ubufakazi bakhe ngoLwesihlanu. USiya, osaphika elala ngomhlane ukuthi washaya ummangali, utheleke enkantolo edlubhe isudi e-navy, ihembe eliluhlaza okwesibhakabhaka, izibuko ezidimile nezicathulo ezimnyama bhuqe.
Ummangali wavulela uSiya icala lokushaya ngenhloso yokulimaza emuva kwengxabano eyaba phakathi kwabo ngo-Agasti 31, nyakenye. USiya wabe esecela ukumiswa ekusakazeni uhlelo abelwethula kuKhozi FM, Ubusuku Obuhle, phakathi nezinsuku ngo-8 ebusuku.
Sekuwumlando ukuthi isivumelwano ebesiphakathi kukaSiya noKhozi sigcine singasavuselelwanga, okwenze izinyawo zikaSiya zagcwala udaka kulo msakazo.
Uhlelo obelwenziwa nguSiya lugcine selunikezwa uNkosinathi Mshengu emuva kokuphenduka ubhandelomtshelekwane njengoba bekugidagida kulo oZama Mseleku, Dkt Lucky Nkosi nabanye.
USiya uqophe umlando ngokuba wumsakazi wokuqala ukusakazela Ukhozi neMetro FM njengoba abenza khona iCommand Your Day, okuwuhlelo olugcine selusakazwa wuRorisang Thandekiso.