Ubumnandi bubuzwa kumaMetro Music Awards

ZONKE izindlela  kubathandi bobumnandi zibheke kumaMetro FM Music Awards, eMbombela Stadium, eMpumalanga. Ubumnandi buqala namhlanje  kwiMetro FM Music Awards Official Pre-Party eseThe Lifestyle Grand ngo-7 kusihlwa.

Kulo mcimbi kuzobe kushiyelana inkundla uLamiez, Naked DJ, LKG,Mawhoo, Lulo Cafe, Madumane,Cliff, Chrizozo, Golden Soul, XMuzy, Mpho Less, Zieondeck, Bino noDr OZ. Uhlelo luzobe luphethwe wumsakazi wohlelo lwantambama uTbo Touch. NgoMgqibelo amabombo azobe eselibhekisa eMbombela Stadium lapho injabulo izoqala khona ngo-6 ntambama kuze kulamule ukuphuma kwelanga ngeSonto. 

 Kuzoqala kumenyezelwe abahlabane kulo mqhudelwano wezindondo waminyaka yonke. Kubona kukhona uMakhadzi, Sjava, DJ Maphorisa, Kabza De Small, Thandiswa Mazwai, K.O, Nomfundo Moh, Mawhoo, Nontokozo Mkhize, DJ Tira nabanye.  Uhlelo luzobe luphethwe wumsakazi walesi siteshi, uLuthando "Lootlove" Shosha noSiyabonga "Scoop Makhathini" Ngwekazi. Laba bathe sebemagange ukuphatha uhlelo lwalo mcimbi. 

Umrepha ongumethuli wezinhlelo zethelevishini, u-Anele Zondo noMpumi Mlambo bazobe benkanise kwi-Black Carpet. Umsakazi weTop 30 kwiMetro FM nomrepha uThato "L-Tido" Madonsela, bazobe bexoxisana nabawinile kwiGreen Room. Emuva kokuklonyeliswa kwabaculi kuzobe sekuqala iMetro FM Music Festival ngo-10.30 ebusuku.

Kubaculi abazobe benandisa kubalwa uDJ Maphorisa, K.O, Zee Nxumalo, Master KG, Black Motion, LKG, Uncool MC, Lamiez, Benny Mayengani, Deep Sean, Nelly Sphe, Dolly Yamaha, DJ Mpapa, Leehleza, Pro Tee, Luminous noTPZ.

NgeSonto kwiMetro FM Love Movement All White, eMbombela Braai Pack kuzobe kunandisa uNkosazana Daughter, Babalwa M, Naledi Aphiwe, Lwah Ndlunkulu, Nontokozo Mkhize, Mthandeni SK, Donny Ngwenyama, Wilson B Nkosi, Sentle Lehoko, Lulo Cafe, Msizi Shembe, Paul Mtirara, Bholoja, MaKhumalo, Thami Madonsela, Phumla Music nabanye. 

Likhulu ithemba lokubuya nendondo yalo yokuqala emculweni iqembu iWoodblock DJs eqokwe kane kulo mcimbi.

Leli qembu laseMthwalume libophele uScelo "DJ Butternut" Nkomo noMthobisi "Thobzin" Vuma. Lizakhele udumo ngengoma eshise izikhotha iSkuta Baba elipike kuyo iqembu Abafana Beskuta (Mvelost, Set Off noSomololo).

Le ngoma ize yathakwa kabusha sekufakwe abaculi abahlukene abadumile.

Kulama awards liqokwe emunxeni weBest Music Video, Best Viral Challenge, Best Collaboration neSong of the Year.

UButternut uthe bayazethemba ngokuthi bazokwazi ukuthola indondo yabo yokuqala.

"Ithemba likhulu ngoba sithe ukuphumela nasemphakathini sicela amavoti. Esiyifuna kakhulu ngeyeSong of the Year ngoba ihambisana neMotsepe Foundation, kusho ukuthi ikhona into ehamba nayo. Emncintiwaneni wengoma ehlukanisa unyaka kuKhozi FM yaphuma endaweni yesikhombisa," kusho uButternut.

Uthe ingoma yabo ibavulele iminyango eminingi ngoba baqashwa emicimbini futhi basayine isivumelwano sokusebenzisana ne-Universal Music.