Kuzogujwa uSuku lwabaSebenzi ngedili le-jazz

IZINGWAZI zomculo we-jazz zizoshiyelana inkundla kwi-International Jazz Day Celebration eTrump Roof Top Garden ku-77 Monty Naicker Street, eThekwini kusasa kusukela ngo-12 emini.

Kule ndumezulu yomcimbi kuboshelwe izihlabani ezingoBongani Nkwanyana, Mthobisi Mthalane, Vincent Mtetwa’s Trio, Talent Mbatha “Mzukulu”, Victor Sithole, Royalson (Afro Jazz & Soul), Mbali Nzama (Afro Jazz Gospel) nabanye abaningi.

Ngaphandle kwalaba baculi, kuzobuye kusine kudedelane nama-Jazz Clubs' DJ (Selectors) ahlukahlukene.

Umgqugquzeli waleli dili, u-Atlas Duma weSagiya Foundation, uthe kuzobe kuhlangene  nabathandi balo mculo ababizwa ngeKZN Jazz Appreciators Association, okuyinhlangano ehlanganisa wonke ama-District Jazz Associations asebenzisana  namaJazz Clubs azinze ezindaweni ezihlukahlukene.

"Lokho kungenxa yokuthi i-International Jazz Day yasungulwa yi-UNESCO (United Nations Educational, Scientific and Cultural Organisation) neHerbie Hancock Institute of Jazz. Lezi zinhlangano zigqugquzela amazwe omhlaba ukuba kugujwe lolu suku, okusiza ekwakheni amathuba omsebenzi, ukuhlanganyela ndawonye kwabantu ngothando, ukwakha amathuba ezokuvakasha, ukulekelela ekwakheni umnotho nokunye."

Akukhona okokuqala kuba nomcimbi walolu hlobo kodwa sekuwunyaka wesibili. NgoMeyi 3, 2023,  iSagiya Foundation ibambisene noMnyango wezobuCiko namaSiko kuzwelonke baletha indumezulu yeKZN International Jazz Day Festival, eyayimeme izinkakha ze-Jazz okubalwa kuzo uRichard Bona (USA/Cameron), Yayoi Ikawa (Japan), kanti elakuleli lalimelwe  wuDkt Nduduzo Makhathini,  Mbuso Khoza, uDkt  Xolisa Dlamini, Zawadi Yamungu, Mthobisi Mthalane, Bongani Nkwanyana, Demi, Neil & Nibs Trio kanye noSelaelo Selota.

"Ngenxa yokhetho lukazwelonke lwanyakenye kanye nokushintshwa kongqongqoshe bomnyango wezemidlalo, ziningi izinhlelo ezihlabahlosile ezingabange zisanakekeleka. Siyathemba-ke ukuthi njengoba sekufike ungqongqoshe omusha, uNgqongqoshe uGayton McKenzie, luzoba khona ushintsho, anakekele izinhlelo zobuciko ezifana nalolu, ikakhulukazi njengoba kuyiyo yodwa le -Jazz Festival ehlanganisa izingwazi zomhlaba eKZN."

U-Atlas unxuse uhulumeni wakulesi sifundazwe neminye iminyango yawo enjengowobuCiko namaSiko, owokuThuthukiswa koMnotho, uMasipala weTheku, Durban Tourism, Business Support, kanye nezikhungo zabo ezifana ne-ICC ukuba baseke lo mcimbi.

"Sizwakalisa ukubonga kakhulu kuMnuz Linda Mbonambi ongumqondisi womnyango weThekwini Municipality Area Based Management Unity, osakwazi ukuwalalela futhi alekelele lapho edingeka khona  ukugcina nokuthuthukisa i-Jazz KwaZulu Natal."

Esephetha u-Atlas, uthe abafuna ukuthenga amathikithi mabamthinte ku-081 373 8185.