ISITOBHA seMamelodi Sundowns, uGrant Kekana, sesivumile ukwelula inkontileka yaso neqembu ngaphambi kokuqala kwesizini ka-2024/2025.
Leli phephandaba lithole ukuthi uKekana (31) ukhona kubadlali beSundowns abayoqhubeka namalungiselelo e-Austria kulandela ukuvumelana ngenkontileka entsha kwezinhlangothi zombili.
Emasontweni edlule kuvele imibiko ethi wongaphansi nongaphezulu phakathi kukaKekana nezikhulu zamaBrazillians.
Kuthiwa lo mdlali oyibamba emuva phakathi nendawo, unqabe ukusayina inkontileka yeminyaka emibili ebihambisana nombandela wokuyivusela ngowodwa. Inkontileka kaKekana kwiSundowns iphele ngenyanga edlule.
Kuvele ukuthi uKekana unengwe wukuthi akanyuselwanga imali ngendlela abeyilindele. Imibiko iqhube yathi uFlemming Berg oyiSporting Director yaleli qembu, ubuye neyonyaka owodwa ebingenawo umbandela wokuvuselelwa. Nakuba kuvela ukuthi ubukhona uchatha kodwa uKekana kuthiwa akayemukelanga. Kuthiwa ubekhala ngokusayiniswa inkontileka yesikhathi esifishane nangayo imali.
Ukungayivumi inokontileka entsha kwiSundowns kukaKekana, kulandelwe yimibiko ethi ufunwa uthuli iKaizer Chiefs ezicijela ukuqala kwesizini eTurkey. Lesi sitobha sisanda kunqoba umklomelo weDStv Defender of the Season.
Umthombo waleli phephandaba uthe uKekana ngomunye wabeSundowns abafulathele elakuleli ngoMgqibelo. Uthe nayizolo (ngeSonto), kuqalwa ukujinywa e-Austria, ubengazibekile phansi.
Umthombo uqhube wathi nakuba ungasazi ukuthi igama lakhe lifakwe nini ohlwini lwabahambayo kodwa yinto exoxwayo eChloorkop ukuthi nangesizini ezayo uzobe ekhona.
"Kunabantu abashiyiwe ngenxa yokuthi ngeke babe yingxenye yeSundowns ngesizini ezoqala. Naye uKekana ubezosala. Nakuba kungacaci ngemininingwano ephelele kodwa sizwa kuthiwa udaba lwenkontileka yakhe selusonjululiwe. Ngeke ngithuke uma kubuywa e-Austria esesayine ngokusemthethweni," kubeka umthombo.
Imizamo yokuthola imenenja kaKekana, uSteve Kapeluschnik, ayiphumelelanga kwazise ubengaphenduli futhi nemiyalezo athunyelelwe yona ubengayiphenduli. Uhlangothi lweSundowns alutholakalanga.
Nakuba ngoJuni uKekana ubengabizwanga kwiBafana Bafana ebidlala eyokuhlungela ukuya eNdebeni yoMhlaba yango-26 kodwa ubekhona kwi-Africa Cup of Nations (Afcon) ekuqaleni konyaka e-Ivory Coast.
Uqhube wathi enye into ebambezele izingxoxo zenkontileka ukuthi i-agent kaKekana, uKapeluschnik beyimatasa nodaba lomqeqeshi uRhulani Mokwena osejoyine iRaja Casablanca yaseMorocco.
Imidlalo yokungcweka yeSundowns e-Austria izoyiqala kusasa neSV Sandhausen yaseGerman, ngo-5.30 ntambama. NgoLwesithathu izobhekana neDynamo Kyiv yase-Ukraine,n ngo-5. NgoJulayi 23 izodlala neCardiff yaseWales ngesikhathi esifanayo.