UMQEQESHI waMaZulu FC, u-Arthur Zwane, uyamvikela unozinti wakhe, uRichard Ofori, owenze amaphutha amabili aholele ekutheni leli qembu liphunyukwe ngamaphuzu amathathu libhekene neKaizer Chiefs emdlalweni weBetway Premiership eFNB Stadium, Nasrec, ngoLwesibili.
USuthu lungenelwe yigoli kuqala ngesikhathi u-Ofori ehluleka wukubamba ikhona ebibukeka ilula, yagcina enethini isishaye kuzakwabo uRamahlwe Mphahlele. AmaZulu abuyile ashaya amagoli amabili kodwa lo nozinti waphinda wawenzela phansi elanda ibhola ebelingaqondile epalini elifaka enethini. Umdlalo uphele zibambene ngo 2-2. U-Ofori usayiniswe wuSuthu ngoSepthemba, nyakenye, ethenjiwe kulandela isifo esifanayo ebesihlasele uVeli Mothwa. UMothwa uzakhele isigcwagcwa kubalandeli bebhola eMzansi ededela ibhola ngesikhathi iBafana Bafana ibhekene ne-Uganda emdlalweni ophele ngo 2-2. Ukuphindile lokho kuMaZulu ehlulwa yiPolokwane City emuva kwezinsuku ezimbalwa.
U-Ofori ucekela phansi Usuthu koweChiefs nje, ubebuyiselwe ezintini kulandela ukungenelwa ngamagoli ayisihlanu kukaMothwa ngesikhathi bebhubhudlwa yiStellenbosch ngo 5-0 emasontweni adlule.
UZwane uthe nakuba u-Ofori evusize amagoli amabili kodwa uvimbe amabhola amaningi eChiefs.
“Ngesikhathi sesilandela ngemuva, bebengashaya kalula amanye amagoli amabili noma amathathu ngaphezulu. Kodwa u-Ofori ukwazile ukusitakula, wasigcina emdlalweni. Ngeshwa ibhola wumdlalo wamaphutha futhi ngezinye izikhathi lapho ingcindezi ikhula, amaphutha anjalo ayenzeka. Wenze lawo maphutha amabili amabi obekungathi nganoma yiluphi olunye usuku awavimbe nje futhi kalula,” kusho uZwane.
U-Ofori ucekela phansi Usuthu koweChiefs nje, ubebuyiselwe ezintini kulandela ukungenelwa ngamagoli ayisihlanu kukaMothwa ngesikhathi bebhubhudlwa yiStellenbosch ngo 5-0 emasontweni adlule. Nakuba uZwane emvikela u-Ofori kodwa okwenzeka konozinti boSuthu, kukhomba inkinga enkulu kuleli qembu. Abanye inkinga bayikhomba kumqeqeshi wabo, u-Aubrey Vilakazi, ongene endaweni kaWayne Sandilands. UVilakazi wenyuselwe esikimini esikhulu esuka enkulisa yoSuthu kodwa akanaso isipiliyoni esigabeni esikhokhelayo.
UZwane ophume nephuzu kwiChiefs okuyiqembu ahlale kulona iminyaka engaphezu kuka-20, uncome umqeqeshi, uNasreddine Nabi, ngesibindi ngokukholelwa kubadlali abasebancane okukhona kubona uMduduzi Shabalala, Wandile Duba, Mfundo Vilakazi nabanye.
“Ngicabanga ukuthi kudingeka umqeqeshi uNabi anconywe ngokukholelwa kwakhe kubadlali abasebancane abafice eqenjini phezu kwengcindezi abhekene nayo yokuletha imiphumela. Abanye abantu bebengakholelwa kobekuzanywa yiChiefs kule minyaka edlule ngalaba badlali abasebancane kodwa manje imiphumela isiyabonakala njengoba laba badlali sebekhombisa ukuvuthwa nokukwazi ukuthwala iqembu, ikakhulukazi selokhu kuqale le sizini,” kusho uZwane.