UNGENE ezintangeni umqeqeshi weKaizer Chiefs, u-Arthur Zwane, ngokuba khona kwezithenjwa u-Itumeleng Khune noCaleb Bimenyimana, emdlalweni womkhaya baseSoweto ne-Orlando Pirates weDStv Premiership, ongoMgqibelo ngo-3.30 ntambama, eFNB Stadium.
UZwane ubekhuluma esithangamini nabezindaba ngoLwesine, ekomkhulu lePremier Soccer League (PSL), eGoli.
Bekuvele kubhekwe ngabomvu ukuthi uZwane uzophendula athini ngokuba khona kukanozinti uKhune, oyisithandwa sabalandeli nomgadli waseBurundi, osezifake wagxila ezinhliziyweni zabathandi beChiefs, ngamagoli aseyishayele wona kusukela efikile.
UKhune ulimale koweligi neStellenbosch FC, kwaba sengathi uzowuqala oweTS Galaxy ngesonto eledlule. Uphinde wahoxa ngoba ekhala ngobuhlungu abebuzwa edolweni besazivocavoca.
UBimenyimana uye kowomlenze wesibili weMTN8 naMaZulu ngempelasonto, kunongabazane ngaye ngenxa yakho belu ukulimala.
Uwuqalile umdlalo woSuthu kodwa wabuye wakhishwa kubukeka sengathi uthunukale lapho ebevele elimale khona.
UZwane akazange aphumele obala ngesimo salaba badlali okungangatshazwa ukuthi bobabili bamqoka kuyena emdlalweni okuyiwa kuwo ngokwesipiliyoni sikaKhune kowomkhaya nangokwamagoli angaqhamuka kuBimenyimana. UKhune uphuthwe yimidlalo emibili edlule yomkhaya ngenxa yokulimala.
“Okwamanje sisabheke kakhulu ekuhleleleni kahle iPirates kodwa ngokwabadlali abazobe bekhona noma bengekho, akukho engingakusho kwazise sisalindele umbiko wethimba lodokotela, okuyiwona ozosicacisela okuningi,” usho kanje uZwane ebuzwa ukuthi bazobe bekhona yini uKhune noBimenyimana.
“Siya emdlalweni neqembu elenza kahle kulezi zinsuku, ngakho kubalulekile ukuthi sizinike isikhathi esanele ukucubungula izindlela ezinobuhlakani zokudida iPirates.
“Ngemuva komdlalo waMaZulu weMTN8, kube nemihuzuko yize ibingatheni kubadlali abaningi ngokwahlukana kwabo, ngakho-ke bonke sibabheke ngeso lokhozi ukuze sizoba nesithombe esiqondile ukuthi yibaphi abazobe bekhona, nokuthi yibaphi abazobe bengekho kowomkhaya baseSoweto.
“Kusasa ekuseni (ngoLwesinhlanu), kulapho sizothola khona umbiko ogcwele ngabadlali esizokwazi ukubasebenzisa nesingeke sikwazi,” kusho uZwane owine owabakhaya wakhe wokuqala edlalela iPirates, waphinde wenza okufanayo esekwiChiefs.