UNOZINTI nokaputeni weBafana Bafana, uRonwen Williams, akawuvalile umnyango ngokuthola amadlelo aluhlaza eqenjini laphesheya kwezilwandle yize esanda kwelula inkontileka yakhe ngeminyaka emine neMamelodi Sundowns.
UWilliams owafika kwiSundowns ngo-2022, kade esehlale iminyaka engu-12 kwiSuperSport United, usephenduke omunye wabadlali abaphambili e-Afrika ngenxa yobuqhawe bakhe kwiSundowns nakwiBafana.
Namanje kusakhulunywa ngobuqhawe uWilliams abukhombise kwi-Africa Cup of Nations (Afcon) ebise-Ivory Coast ngasekuqaleni konyaka.
Lo nozinti wavimba inqwaba yamaphenathi kwi-Afcon, wasiza iBafana yaqeda endaweni yesithathu kulo mqhudelwano.
Akagcinanga lapho kepha uqokwe njengonozinti ovelele obekudweba isithombe sokuthi uzoba yinyama emaqenjini aphesheya kwezilwandle.
Emasontweni ambalwa adlule, uWilliams wengeze inkontileka abenayo neSundowns ngeminye iminyaka emine osekuzomgcina eChloorkop kuze kube uJuni ka-2028.
Kubashiye bexakekile abaningi nokho ukwelula kwalo nozinti inkontileka kwiSundowns ngoba ngesikhathi eshiya kwiSuperSport, wathi inhloso yakhe ukusebenzisa iSundowns njengesitebhisi esizombeka phesheya kwezilwandle.
“Bengizitshela ukuthi izingcingo zizongena ubuthaphuthaphu kwimenenja yami nakwiSundowns emuva kwe-Afcon, kodwa kuthe uma kucweba iziziba ngabona kungcono ngilule lapho ngijwayele khona,” kusho uWilliams kwabezindaba emcimbini wemiklomelo yeCosafa, obubanjwe okokuqala eSandton Convention Centre, eGoli, ngeledlule.
“Zibukeka zizinhle izinto kwiSundowns nakhu neFifa Club World Cup isiseduze, kwazi bani mhlawumbe iyona ezovula amasango.
“Ngiyelulile inkontileka neSundowns ngoba ngineme ngakho konke kuyona kanti nayo kubukeka sengathi ineme ngami. Ngalokhu angisho ukuthi sengililahlile iphupho lami lokuya phesheya kwezilwandle.
“ISundowns isenezifiso zokwenza izinto ezinkulu, engingafihli ukuzwakalisa isifiso sokuba yingxenye yazo. Uma kukhona okuqhamukayo okuthinta amadlelo aluhlaza, ngeke ngizithambise.
“Iqiniso ukuthi uma kuqhamuka iqembu laphesheya kusemqoka ukuthi lokhu elikubeka etafuleni kuyayanelisa iSundowns enginenkontileka nayo,” kuphetha uWilliams.
Lo nozinti ubhekwe nasemiklomelweni eminingi eyahlukene njengoba isizini yeDStv Premiership izosongwa emasontweni ezayo.