TS Galaxy (1) 1
Kaizer Chiefs (0) 1
Umgadli onuka umzondo kubalandeli beKaizer Chiefs, uRanga Chivaviro, utakule leli qembu seliyoshona libuya nephuzu kwiTS Galaxy emdlalweni weBetway Premiership eMbombela Stadium, eNelspruit, ngoMsombuluko ntambama.
IChiefs kuphele isikhathi esijwayelekile somdlalo ilandela izama igoli lokucisha elikaSamkelo Kabini alishaye esiwombeni sokuqala. Igcine ilithole esikhathini esengezwe ngunompempe ngonyawo lukaChivaviro ongathandwa ngabalandeli.
IChiefs, ehamba phambili ngokungenelwa ngamagoli kwiPremiership (13), ingene enkundleni abalandeli bebheke ukuthi ishintshe isimo kwazise ibiphuma esibhaxwini sePolokwane City. Nokho isikimu somqeqeshi, uNasreddine Nabi, besingakukhombisi lokhu kwazise uqalise inqwaba yabadlali abamakayo esiswini okunguYusuf Maart, Njabulo Blom noSibongiseni Mthethwa. Lokhu kwenzeke phezu kokuba uNabi ekhale ngokwehluleka kwezakhe ukushaya amagoli nakuba bakha indathane yamathuba.
IGalaxy ikhombise izimpawu zokuba nomfutho umdlalo uqala. Obekusobala wukuthi abadlali beChiefs basenamatata kwazise bebesuka endukwini ka 2-0 wePolokwane City.
Ngaphandle kwamaphutha amathathu ka-Inacio Miguel acishe amqhatha nabalandeli umdlalo usanda kuqala, ayikho iminyakazo etheni ebiqhamuka nezivakashi.
Kube sengathi iyavuka iChiefs maphakathi nesiwombe sokuqala kodwa u-Ashley du Preez wayeka ithuba elilula ngomzuzu ka-29 kodwa wahluleka.
Ngesikhathi kubukeka sengathi iChiefs ibuyelwa ukuzethemba iphoxwe yigoli likaKabini alingqofele enethini ngomzuz ka-35. Kuyiwe ngaleli goli ekhefini.
UNabi uqale isiwombe sesibili ngokufaka, oChivaviro, Mfundo Vilakazi noTebogo Potsane, ezindaweni zoWandile Duba, Njabulo Blom noDu Preez.
Kube sengathi inkundla iyaphaphama ngenxa yalezi zinguquko kwazise iChiefs iqalile yangqongqoza ezintini zamaRockets yize lokhu bekuyishiya ivulekile emuva kwesinye isikhathi. Esikhathini sikanondweba, iChiefs igcine ilinganisile ngonyawo lukaChivaviro.