NJENGOBA sekubalwa amahora kududulane iMamelodi Sundowns neKaizer Chiefs, wonke amehlo azobe ethe njo kumqeqeshi waMakhosi, uNasreddine Nabi, ukuthi aqede ukucanasa kwamaBrazilians uma ebhekene naleli qembu lasePhefeni.
AmaSandawana naMakhosi bazotholana phezulu koweBetway Premiership ozoqala ngo-3.30 ntambama, eLucas Moripe Stadium, e-Atteridgeville, ngoMgqibelo.
Lo mdlalo kwakuhlelwe ukuthi udlalelwe eLoftus Versfeld kodwa kwaphoqeleka ukuthi ufudukele e-Atteridgeville ngenxa yokuthi kuzobe kunomdlalo wombhoxo phakathi kweVodacom Bulls neDHL Stormers eLoftus ngoMgqibelo.
AmaBrazilians asahamba wodwa esicongweni seligi ngokwamaphuzu. Nokho, isakhona ingcindezi kuleli qembu lasePitoli njengoba i-Orlando Pirates esendaweni yesibili, ingalinciphisa igebe libe ngamaphuzu amathathu uma ingayinqoba yonke imidlalo esalele emuva ngayo.
Amakhosi asendaweni yesishiyagalombili ngamaphuzu awu-25 emidlalweni engu-18. Leli qembu lisengcupheni yokuphuma kwiTop 8 uma lihluleka ukubamba umgqigqo omuhle emidlalweni ezayo.
IChiefs yagcina ukunqoba iSundowns ngoMeyi ka-2021, iyiguqisa ngo 2-1 koweligi owawuseLoftus Versfeld.
Ngaleso sikhathi amaBrazilians ayesedlale imidlalo engu-23 yeligi engayazi induku. IChiefs, eyayicijwa nguGavin Hunt, yilona kuphela iqembu elathatha amaphuzu aphelele kwiSundowns ngesizini ka-2020/21
Igoli lamaSandawana lashaywa nguGaston Sirino osegijima kwiChiefs. AwaMakhosi aqhamuka ngesikhathi umkhonto wesitobha seSundowns, uMosa Lebusa, ugwaza ekhaya, elokunqoba labekwa enethini nguDumisani Zuma.
Kusukela lapho la maqembu asebhekene emidlalweni ewu-11 emiqhudelwaneni ehlukene, iChiefs yanganqoba nowodwa.
Umqeqeshi uNasreddine Nabi, ocija Amakhosi okokuqala kule sizini, usefike wazizwela isitswebhu seSundowns.
Imqale ngesibhaxu sika 2-1 koweligi ngoSepthemba, yamtalabha ngo 4-0 koweCarling Knockout ngoNovemba nyakenye.
Umdlali oseyihluphe kakhulu iChiefs kule sizini u-Iqraam Rayners, oshaye igoli elilodwa koweligi namabili kuma-quarterfinal eCarling.
ISundowns ihamba phambili ngamagoli kwiligi yakuleli njengoba isihlohle angu-32. Izohlangana neChiefs, ebalwa namaqembu anodonga lwasemuva olubuthaka, kwazise isingenelwe amagoli angu-23.
Ingcindezi ikuNabi ukuthi akhombise ukuthi kukhona akufundile emidlalweni asebeyidlalile neSundowns nokuthi aqhamuke namaqhinga azoqinisekisa ukuthi ezakhe ziphuma nokuthile enkundleni kulo mdlalo.
Ukunqoba kweChiefs kungase kube nomthelela omuhle kwisizini yayo njengoba idinga eminye imiphumela emihle emidlalweni emikhulu. Ukunqoba kwayo iStellenbosch FC kabili kukhombisile ukuthi iyakwazi ukunqoba imidlalo enzima kodwa konke kusalele ekutheni ivale emuva.