NAKUBA umqeqeshi weRichards Bay, uPitso Dladla, engayithandanga indlela abadedele ngayo amaphuzu bebhekene neChippa United kodwa ubathulela isigqoko abadlali bakhe“ngesibindi” abasitshengisile ngaphambi kokuya ekhefini leNdebe yoMhlaba.
Ngempelasonto ezikaDladla zibambane neChippa ngo-3-3 koweligi buseBidvest Stadium.
AmaNatal Rich Boys kumele azisole wona ngokuhlulwa wukuthola amaphuzu amathathu kulo mdlalo.
Ashaye amagoli kuqala, aqede avumele iChippa ukushaya awokulinganisa.
USomila Ntshundwana ushaye amabili. Elesithathu kube wumkhonto ogwaze ekhaya kuZuko Mdunyelwa weChippa.
Yize iBay igcine idedele amaphuzu amabili kodwa ikwazile ukuqhubeka nokuhlala endaweni yesibili ngemuva kokuthi iSuperSport United ebingayigudluza ibanjwe yiSwallows komunye umdlalo weligi ophele ngo 1-1.
INatal Rich Boyz, okuyisizini yayo yokuqala kwiPremiership, isiqoqe amaphuzu awu-23 emidlalweni ewu-13.
Mayelana nomdlalo weChippa, uDladla uthe kumele bazisole bona.
"Ayingiphathanga kahle indlela esizihlinzele ezibini ngayo emdlalweni weChippa. Lo mdlalo bekumele siwunqobe kalula. Siyeke iChippa yashaya amagoli okulinganisa singekho isidingo. Siphinde sakha namanye amathuba okumele ukube siwashaye kalula. Isifiso sami bekuwukuthi siye ekhefini leNdebe yoMhlaba sinqobile. La maphuzu esiwalahle kwiChippa abezowenza umehluko," kubeka uDladla.
Imidlalo yeDStv Premiership isimile kuleli, kuze kube wuDisemba njengoba kuzoyiwa kwiNdebe yoMhlaba eqala ngoNovemba 20, eQatar.
Umdlalo wangempelasonto bekungowesishiyagalombili iBay ingayazi induku.
Lokhu yikhono kwenze uDladla wabancoma abadlali bakhe ngokuba nesibindi yize ebengajabule ngomphumela.
IBay izobuya ensimini neSwallows ngoDisemba 31, bese kuba oweMamelodi Sundowns ngaphambi kokuqala imidlalo yomzuliswano wesibili.
"Kungaba yiphutha uma ngingabancomi abadlali bami, ngokuyibamba ishisa phezu kokuba kuyisizini yokuqala sidlala esigabeni esiphezulu. Kunjalo-ke ukusebenza ngokubambisana. Ngibabonga bonke ozakwethu. Izandla zidlula ikhanda kusihlalo wethu, ngokuhlale eseseka. Nakuba kunjalo usemkhulu umsebenzi osasihlalele. Esizokulwela wukuthi siqhubeke nokuzimisela, bese silungisa amaphutha agqame emidlalweni edlule, kuhlanganisa noweChippa. Kusazoba nzima. Kuza umzuliswano wesibili weligi," kusho uDladla.