KUVELA ukuthi usekhonjwe indlela umqeqeshi weNjampela FC, uTshepo Motsoeneng, ngaphambi kancane kokuqala kwemidlalo yokuvula yesizini ka-2024/2025 yeSafa KwaZulu-Natal ABC Motsepe League eqala kule mpelasonto.
Izindaba zokushiya kukaMotsoeneng ziqinisekiswe yileli qembu esitatimendeni yisitatimende esikhishwe ekhasini lalo le-Facebook ngoLwesihlanu.
Ngokwesitatimende, kuvela ukuthi njengoba sekugqabuke igoda phakathi kukaMotsoeneng naleli qembu, izintambo zizobanjwa nguNkululeko “Chicken” Nzama obeyiphini lakhe uMotsoeneng.
UNzama nguyena ozobe ehola leli qembu emdlalweni walo wokuvula wesizini elizowudlala neMuzi King Masters, KwaNgcedomhlophe Stadium, eMandeni, ngeSonto ngo-3 ntambama.
UMotsoeneng ukhonjwa indlela nje, akukapholi maseko iNjampela imangaze abaningi idla umhlanganiso emqhudelwaneni wokuzifudumezela ukuqala kwesizini obekungowokuhlonipha uMntwana uMangosuthu Buthelezi, iPrince Mangosuthu Legacy Cup, ngoSepthemba ngokuguqisa iRichards Bay FC edlala kwiBetway Premiership, kowamanqamu.
Ngesizini edlule leli qembu laKwaNongoma beliholwa nguMotsoeneng, lidle isicoco seSafa KZN ABC Motsepe League, lamela isifundazwe kumaPlay-Offs kazwelonke okuzabalazela ukukhushulelwa esigabeni seMotsepe Foundation Championship abedlalelwa e-Upington, eNorthen Cape, kodwa lakhala ngaphansi.
Kwagcina kuphumelele i-Highbury FC yase-Eastern Cape neKruger United yaseMpumalanga, okuyiwona maqembu angomakoti kule sizini kwiMotsepe Championship.
Imidlalo yeSafa KZN ABC Motsepe League:
NgoMgqibelo - Ngo-3pm:
Durban Pioneers v Umvoti FC (King Zwelithini Outer Field)
NgeSonto - Ngo-3pm:
Summerfield Dynamos v Midlands Wanderers (Road 1016 Field); Muzi King Masters v Njampela FC (Ngcedomhlophe Stadium); Chess FC v Newcastle All Stars (Osizweni Stadium); Drakensberg FC v Msinga United (Wembezi Stadium); Junior Eleven FC v Kwamashu Durban Knights FC (Kandahari Stadium); Ethekwini Coastal FC v Mkhambathi FC (Twinnie Park); Ditlou FC v Mshwathi United FC (Edgewood Campus)