UKUNGANQOBI emidlalweni emibili kwenze umqeqeshi weRichmond United, u-Edward Lisene enze izinguquko eqenjini lakhe ebelibhekene neFirst Touch FC emdlalweni weHollywoodbets Super League ngeSonto.
Womabili la maqembu abebambene ngezihluthu e-Old Peter Mokaba Stadium lapho okunqobe khona iRichmond United ngo-2-0.
IRichmond United ngaphambi kwalo mdlalo neFirst Touch FC, beyilele endaweni yesishiyagalolunye, iFirst Touch yona ilele kweye-11.
Ukunqoba kwayo kuyinyusele endaweni yesihlanu ngamaphuzu angu-11 emva kwemidlalo eyisithupha esadlaliwe kuHollywoodbets Super League.
"Uma singanciphisa amaphutha nokuyinto esenze ukuthi sihlulwe emidlalweni yethu emibili edlule, angiboni sihlulwa okuyinto eyenzekile.
“Abadlali bethu basemuva nonozinti bebezimisele kakhulu. Wonke umuntu ubedlala ngokuzikhandla.
“Iqembu lisebenza kanzima futhi bayasebenzisana, bayalwelana okuyinto esihlezi siyigcizelela ukuthi abayenze ngoba iqembu elingasebenzisani ngeke liwine," kusho uLisene.
Uphinde walandisa ukuthi bebewulindele umdlalo onzima okuhlanganisa nokukhahlelwa kodwa bazamile ukudlala ibhola elisheshayo esiwombeni sokuqala nokungabasebenzelanga.
Uthe ngesiwombe sesibili bafake abadlali abakwaziyo ukudlala ibhola okuyinto ebasebenzelile kakhulu,
Owe First Touch FC, uMmowa Kekana uthe noma iqembu lakhe lihluliwe kodwa lidlale ngokuzimisela.
"Iqembu lethu lidlale kahle ngeshwa senza amaphutha amabili okuyiwona enze sangenelwa amagoli amabili. Eminye imidlalo uyayiwina, eminye uhlulwe kuyo ibhola linjalo, sizobuyela ejimini silungise.
“Ngizama ukulungisa iqembu lami ukuthi libe sezingeni ngoba kuyona yonke imidlalo siyazi ukuthi kumele sifake, bani siyeke bani ukuze sithole esikufunayo," kusho uKekana.
Omunye umdlalo obubhekiwe ubuphakathi kweCopperbelts Ladies enqobe ngo-6-1 iguqisa iThunderbirds Ladies. IThunderbirds yiyona kuphela engakaze inqobe selokhu kuqale imidlalo yeligi nokuyenza ihlale emsileni kwi-log.
Komunye umdlalo obungempelasonto, i-UJ FC inyukele esicongweni se-log ngokuguqisa iCity Lads ngo 3-2. Isinamaphuzu awu-13.
Imiphumela yeHollywoodbets Super League: City Lads FC 2-3 UJ FC; Copperbelts Ladies 6-1 Thunderbirds Ladies, First Touch FC 0-2 Richmond United FC.