KUZOCACA ngeqembu leSafa KwaZulu-Natal ABC Motsepe League elizozibekisela indawo emzuliswaneni weLast 32 weNedbank Cup ngemidlalo yamanqamu ezodlalelwa eHarry Gwala Stadium, eMgungundlovu, namuhla ngoLwesibili.
Sekusele amaqembu amane okunguMkhambathi FC, Chess FC, uMvoti FC neJunior Eleven.
Emdlalweni wokuqala weyandulela owamanqamu kuzovula uMkhambathi neChess ngo-10 ekuseni, kulandele uMvoti neJunior Eleven ngo-12 emini, bese owamanqamu udlalwe ngo-3 ntambama.
Nokho iqembu elizonqoba namuhla kowamanqamu lizobe lingakawuqedi umshikashika njengoba lisazodlala nelizodla umhlanganiso kwiSafa Hollywoodbets Regional League, nokuyilapho-ke okuyobe sekuphela amaphupho ngelizomela iSafa KZN kwiLast 32.
Ngokohlelo lweNedbank Cup enika amaqembu asezigabeni zama-amesha eNingizimu Afrika ingqayizivele yethuba lokudlala kulo mqhudelwano womkhumulajezi, ayisishiyagalombili amaqembu eSafa athola ithuba lokuzibekisela indawo kwiLast 32, kube ayisishiyagalombili eMotsepe Foundation Championship, nangu-16 eBetway Premiership.
Maduze amaqembu angu-16 eMotsepe Championship azoqhuthana ukuhlunga ayisishiyagalombili azozibekisela indawo emzuliswaneni weLast 32.
Ngesizini edlule i-Junior Eleven yaseMnambithi - ngaleso sikhathi ebisadlala kwiSafa KZN Hollywoodbets Regional League - yiyona eyadla umhlanganiso emaqenjini eSafa KZN, nokho yehluleka ekugcineni isibhekene neHighlands Park edlala kwiSafa Gauteng Motsepe League ukuhlunga iqembu lesishiyagalombili leSafa ukuzibekisela indawo kwiLast 32.
Lo mqhudelwano weNedbank waziwa ngezimanga lapho amaqembu asezigabeni eziphansi eshaya awePremiership, njengoba kumasizini amabili edlule kwenza iDondol Stars eyayidlala kwiMotsepe League ithela isibhaxu kwiSupersport United naMaZulu FC.