ISTELLENBOSCH FC iqede amaphupho eMamelodi Sundowns okuthatha izicoco ezintathu ngesizini eyodwa iyivathela u 2-1 kumaquarterfinal eNedbank Cup e-Athlone Stadium, eKapa ngoMgqibelo ebusuku.
Empeleni belibhubha nommeli kwiSundowns kwazise negoli ebike ngalo kube ngumkhonto ogwaze ekhaya kanozinti weStellies, uLee Langeveldt.
Amagoli okudla ubhedu eStellenbosch ashwaywe ngu-Iqraam Rayners ngomzuzu ka-38 noka-57.
Ukuphuma kweSundowns kusho ukuthi ngeke isayivikela iNedbank kanti ngaphezu kwalokho, kusho ukuthi ngeke isalifeza iphupho lokuphinda izicoco ezintathu kule sizini.
Izicoco kwiSundowns bezizoba khona ngokuthi njengoba isinqobe isicoco seDStv Premiership, kanti isekumaquarterfinal eCaf Champions League, bese kuzoba yiNedbank Cup eyesithathu.
Nokho-ke lokhu kuphuma kwayo sekusho ukuthi isizogxila kwiChampions League lapho iqhathwe khona emilenzeni emibili neCR Belouizdad yase-Algeria.
Umlenze wokuqala wabo use-Algeria ngomhlaka-22 ebusuku.
ISundowns izolo ihlulwe okokuqala ngaphansi kukaRhulani Mokwena, othathe izintambo zokuhola ibhentshi laleli qembu phakathi nesizini.