UKUBIZWA ngabomsakazo womphakathi ozinze KwaMashu, enyakatho yeTheku, ukuthi azobonakalisa ikhono lakhe lobuntatheli - kwenze wabuyelwa yithemba.
UThobeka Khumalo (27) wasoBonjaneni, eBergville, maphakathi neKwaZulu-Natal, ubuyelwe yithemba lokuthi akusekude kufezeke iphupho lakhe leminyaka.
Usho njalo engxoxweni neSolezwe Ngempelasonto, lapho edalule ukuthi useqashwe yiVoice FM, ukuzofunda izindaba phakathi nezinsuku ohlelweni lwantambama ngo-3 kuya ku-6.
"Leli thuba ngibona lizoba wusizo kakhulu kimina ukuthi ngikwazi ukukhula endimeni futhi ngithole namava engibona ezoba wusizo kakhulu ukuthi ngicabe indlela yami yokuthi ngelinye ilanga ngisebenzela isikhondlakhondla somsakazo Ukhozi FM. Kwakhona nje ukuthi leli thuba lizizele lona kimina, njengoba kungumphathi wezindaba zeVoice owangicela ukuthi ngijoyine umsakazo wabo - kwenze ngabona ukuthi kukhona okuhle engikwenzayo endimeni futhi sengikulungele ukuqhubeka ngikhule," usho kanje uThobeka.
Iqhuba intokazi ithe, abantu abalindele lukhulu kuyona emsakazweni iVoice FM. Yathi leli thuba elithole manje sekuyisikhathi eside ishisekela ukulithola ngoba ikhule iwuthanda umsakazo futhi ikhonze ukukhuluma nokuxoxa. UThobeka uzishaya isifuba ngobumtoti bephimbo lakhe - alichaze ngokuthi ngelikhuni ukuthi umuntu alilalele.
UThobeka uneziqu zobuntatheli aziphothula eRosebank College, ophikweni lwaseThekwini ngo-2020. Uqeqeshelwe ukusakaza eJozi FM ngo-2021, wasebenza kafishane eHillbrow FM ngo-2022 kuya ku-2023. Ngaphambi kwalokho, uke wagxila isikhathi eside emkhakheni wokumodela kanti uke wabhalela elinye lamaphephanda omphakathi aseThekwini.