UMHOLI weMK, uMnuz Jacob Zuma, ubikelwe ngoqhekeko okuthiwa ludla lubi kule nhlangano esifundeni iMoses Mabhida.
Abaholi beMK esifundeni nasesifundazweni iKwaZulu-Natal batshele uZuma ukuthi kulesi sizinda kunamalungu eMK angafuni ukwamukela ubuholi benhlangano obuqokwe ngasekupheleni konyaka ngokusemthethweni.
UZuma ubehambele umcimbi obuhlelwe yinhlangano yamalungelo abantu, iSA Coalition of Civil Society Organizations eWillowfountain, eMgungundlovu izolo.
Umdidiyeli weMK esifundeni iMoses Mabhida, uMnuz Mtolo, uthe kunamalungu enhlangano angafuni ukulandela imigomo.
"Nxamalala njengoba ngilapha ngizobika ukuthi amalungu eMK anenkinga yokuqonda umthetho weqembu. Anenkinga yokuthi alandela abanye abantu, akhonza abantu. Anenkinga yokuqonda umthethosisekelo weqembu."
UMtolo ucele ukuba kube nohlelo lokufundisa amalungu eMK ngemigomo yeqembu.
"Ngiyacela ukuthi kube nohlelo lokufundisa amalungu ngemigomo yeqembu khona ezoqonda kangcono ukuthi kusho ukuthini ukuba yilungu leqembu," kusho uMtolo.
USotswebhu weMK esiShayamthetho, uMnuz Mervyn Dirks, uthe izinto zimapeketwane esifundeni iMoses Mabhida.
Uthe njengoba bekuhlelwa umcimbi wayizolo, bekukhona abanye abaholi beqembu abebezama ukuthi umcimbi ungaphumeleli.
"Abanye abaholi bazame ukusihlanganyela ne-ANC ebifuna ukusincisha inkundla. Abanye balibeke ngembaba elokuthi ngeke beze lana, ngempela futhi abekho lana," kusho uDirks.
Umdidiyeli weMK KwaZulu-Natal, uMnuz Willies Mchunu, uthe inkinga yoqhekeko esifundeni iMoses Mabhida indala.
Uthe le nkinga yagqama kakhulu ngesikhathi kunokhetho lokuchibiyela kuMasipala waseMsunduzi. Kulolu khetho lokuchibiyela olwaluku-ward 2 , abeMK babebanga bodwa.
Amanye amalungu eMK ashintsha igama lomuntu owayekhethwe ukuba amele inhlangano, afaka igama lomuntu owayelale isibili ngesikhathi kunomhlangano womphakathi wokukhetha ozomela iMK.
"Saba nenkinga enkulu e-ward 2. Ngenxa yoqhekeko sahlulwa okhethweni okwakufanele silunqobe. Ingxabano ayikho kumalungu kodwa isebuholini," kusho uMchunu
UZuma uthe bazozilungisa zonke izinkinga ababhekene nazo.
"Nakuba ukhula uMkhonto kodwa siyabona ukuthi kukhona nabangazifakile izimbadada. Bahamba behlatshwa ameva, basala endleleni. Abanye bayantshontsha. Sizokulungisa konke lokho."
UZuma uthe namanje basazimisele ukuthatha izintambo zombuso, wathi balibheke ngabomvu icala abalifakile lapho bephonsela khona inselelo imiphumela yokhetho lwangonyaka owedlule.
Leli cala lizolalelwa kulo leli sonto.
Ngaphambi kokuthi aye emcimbini obuseWillowfountain, uZuma uqale ngokuyonikela ngendlu kuGogo Ngidi, eHammarsdale.
