BAKHALA ngokufunzwa ngenkani iRoyal AM abalandeli beMaritzburg United osuswe ngomzuzu wokugcina eHarry Gwala Stadium umdlalo wayo weMotsepe Foundation Championship neMilford FC.
NgoLwesine abeTeam of Choice bathole ukuthi lo mdlalo wokuqala wasekhaya kwisizini ka-2023/24 sebezowudlalela eKing Zwelithini Stadium, eMlaza, ngoLwesihlanu ngo-7.30 ebusuku.
Leli phephandaba linayo incwadi ethunyelwe yiRoyal AM kuMandla Zuma, oyisikhulu esiphezulu kumasipala uMsunduzi, ebiyibeka ngembaba eyokuthi iTeam of Choice ayidingeki eHarry Gwala.
Kuvela ukuthi ibhalwe ngo-Agasti 7 wuRichard Makhoba oyimenenja jikelele yeThwihli Thwahla.
"Njengemenenja yeRoyal AM Football Club, anginawo amandla okunika ilungelo iMaritzburg United noma elinye iqembu igunya lokuthi siyisebenzise sonke iHarry Gwala Stadium. Ngakho-ke kumele sihlonishwe njalo isinqumo somkhandlu sokunika iRoyal AM yodwa igunya lokusebenzisa iHarry Gwala Stadium.
"Okwamanje igunya lokusebenzisa le nkundla ngeleRoyal AM kuphela. Kasikaze sithole mali kwiMaritzburg yokuthenga okwesikhashana igunya lokujimela khona. Sicela ukuthi ihhovisi lakho lisuse ngokuphazima kweso iMaritzburg endaweni yokujimela. Iqembu lethu leMDC nelamantombazane le ndawo lizoyidinga maduze. Sicela ukuthi iMaritzburg ibheke inkundla ezodlalela kuyo imidlalo yasekhaya.“
ULindokuhle Qwabe, wabalandeli beMaritzburg, ukhale ngokudayiswa wuMasipala waseMsunduzi.
"Lokhu kusiphoqa ukuthi sithande iRoyal AM sekwenze sayizonda. Besizimisele ngokuyeseka kwazise iqembu laKwaZulu-Natal. Manje siyinyanya ukufa. Ngesikhathi iPSL ithi sizoqhubeka nokudlalela eHarry Gwala sijabulile. Bese siyihlelile nemali yokuhambela imidlalo yangaphandle. Asazi ukuthi sizoyithatha kuphi imali yokuya njalo eMlaza ekubeni futhi sisazophumela ngaphandle kwesifundazwe. Okubuhlungu ukuthi eminyakeni edlule iMaritzburg beyiyivumela eHarry Gwala iRoyal AM isaziwa ngeRoyal Eagles."
ULulamile Mapholoba, oyimenenja kaMasipala uMsunduzi, uthe: “Ngamanga ukuthi siyixoshile iMaritzburg. Okokuqala akuwona uMsunduzi owenze iMaritzburg idliwe yizembe. Siwumkhandlu sithathe isinqumo sokuthi akubekhona iqembu lePSL (Premiership) elisebenzisa iHarry Gwala, lelo qembu ke yiRoyal AM.”
“Besinomhlangano noFarouk Kadodia noMaMkhize (Shauwn) lapho ebesizama khona ukuxazulula lolu daba. NgoMsombuluko sizophinda sihlangane futhi ukuthola isisombululo.
Ngokukamasipala, sizothanda ukuthi iMaritzburg United isebenzise iNorthdale Stadium bese iRoyal AM isebenzisa iHarry Gwala,” kusho uMapholoba ekhuluma kuKhozi FM.
UProfessor Ronnie Schloss, (ophasisa izinkundla zePSL), usitshelile ngokudingeka kwenziwe ngumasipala wethu eNorthdale Stadium ukuze leya nkundla ikulungele ukusingatha imidlalo yePSL (Motsepe Foundation Championship).”