ILINDELANI Ladies ithole amaphuzu amqoka emizameni yayo yokuzisindisa ezembeni kwiHollywoodbets Super League ngesikhathi iwathola egcwele ngempelasonto.
Inqobe iDurban Ladies ngo 1-0 emdlalweni womkhaya obuseSugar Ray Xulu stadium, eClermont, ngoMgqibelo ntambama.
Igoli eliweze ezikaNkosinathi Vilakazi livalelwe nguMandisa Faya ngasekuqaleni kwesiwombe sokuqala.
Lo mphumela ushiye iLindelani endaweni ka-15 ngamaphuzu angu-16 emidlalweni engu-28.
Isele ngamaphuzu amathathu kwi-City Lads, esendaweni ka-14.
Leli qembu lase-Eastern Cape lisadlale imidlalo engu-26. Kowakamuva obuse-Isaac Wolfson Stadium, eGqeberha, ngoMgqibelo lidlale ngokulingana ngo 1-1 ne-University of Fort Hare kowomkhaya.
ILindelani izosonga iligi ngemidlalo emibili enzima njengoba izotholana phezulu ne-University of Western Cape ekuhambeni ngoMgqibelo, bese ivala ne-University of Johannesburg ekhaya ngoNovemba. Idinga ukuyinqoba le midlalo ukuzibeka ethubeni lokusinda ezembeni.
IThunderbirds Ladies, osekuvele kuqinisekisiwe ukuthi izokwehlela esigabeni sesibili, iSasol League, ngesizini ezayo, iphinde yaba wukudla kwenduku, ixetshulwa yi-University of Johannesburg ngempelasonto.
Esicongweni kwi-log, iMamelodi Sundowns ibiphumulile ngempelasonto kodwa isaqhwakele ngamaphuzu angu-74 emidlalweni engu-27.
I-University of Western Cape ilinciphisile igebe ngokunqoba iRichmond United ngo 2-1 kodwa isasele ngenqwaba yamaphuzu. Leli qembu laseKapa selihlanganise amaphuzu angu-63 emidlalweni engu-25.
Imiphumela yemidlalo yeHollywoodbets Super league yangempelasonto: Durban ladies 0-1 Lindelani Ladies, Royal AM 3-3 University of Pretoria, Thunderbirds Ladies 0-3 University of Johannesburg, JVW FC 1-2 First Touch, City Lads 1-1 University of Fort Hare, Richmond United 1-2 University of Western Cape, TS Galaxy Queens 2-1 TUT Matsatsantsa.